Shillong: Ki nongdie madan kila pyneh beit triang ban shong beit ha thain Khyndai Lad bad kyntait ban iatreilang wat haba ki pulit bad ka Shillong Municipal Board (SMB) ryngkat ka bor district ka East Khasi Hills kila pyllong ia ka jingtalasi kot ia kiba dei hok bad ki bym dei hok.
Ka Municipal ka la pyllong ia ka jingtalasi kot ia ki nongdie madan ban peit ba tang kiba la ioh ia ka Certificate of Vending (CoV) kin dei hok ban ioh shong die madan ha ki jaka ba la pynkhreh ka sorkar. Hynrei kane ka la buh diengpyngkiang ia ka sorkar namar ba ki nongdie madan kila pyneh bad kila kyntait ban iatreilang. Kila dawa ba dei ban pynneh beit ha thain Khyndai Lad.
Ka jingtalasi kot ka la iaid sha ka 3 sngi kynthih ha ka thain Khyndai Lad.
Ka Municipal ka la pynbna paidbah da ka tynghung ha kane ka taiew ba la dep, ba kito ki nongdie madan kiba la ioh ia ka syrnod ba la ithuh ka sorkar, ki dei ban mih noh na katei ka jaka sha jaka kaba la shna bha ka sorkar jylla. Ka la ai por khadduh haduh 22 tarik Naitung 2025.
Ka Municipal ka la pynkhreh ban pynshong ia ki nongdie madan ha mala kaba ar jong ka Parking ka MUDA bad ha ka parking mar pyrshah ka SBI, Main Branch kiba la dep shna bad pynbiang ka sorkar.
Ki don ar tylli ki seng nongdie madan ba kynthup ia ka Meghalaya and Greater Shillong Progressive Hawkers and Street Vendors Association (MGSPHVA) kaba la ialam ka kong Biolin Pyrtuh bad kawei pat ka dei ka Shillong Road Side Hawkers Association (SRSHA), kaba ialam ka kong Telmi Nongbri.
Ki nongialam ka Meghalaya and Greater Shillong Progressive Hawkers and Street Vendors Association (MGSPHVA) kila kam ba ki don kumba 5 hajar ngut duna ki dkhot kiba die ki nongdie madan ha Shillong, katba ka Shillong Road Side Hawkers Association (SRSHA) ka don kumba 100 ngut eiei ki dkhot.
Ka sorkar ka la pynkhreh ban pyllong ia ka thain Khyndai Lad kum ka jaka bym shah die madan ne No Vending Zone khnang ban wanrah ia ka jingkhuid bad ka jingitynnad namar ba ka Khyndai Lad, ka dei ka ktem ha kaba ki briew ki wan na kylleng ban iaid ban peit kai.
La 3 sngi, thalain ki nongdie madan ia ka Municipal, ym kwah khih na Khyndai Lad
