Shillong: Ka Meghalaya and Greater Shillong Progressive Hawkers and Street Vendors Association (MGSPHSVA) ka kwah ban pynpaw bad pynkynmaw ba naduh ka snem 2016 ka la ȉakhun ban pyntreikam ia ka Aiǹ Street Vendors (Protection of Livelihood and Regulation) Act 2014, bad ba ka angnud ba ia kane ka aiǹ dei ban pyntreikam thik pa thik katkum ki kyndon bad ki rule. Kumta hadien ba ka Meghalaya High Court ka la ai ia ka rai ba khatduh bad bthah ia ka Sorkar Meghalaya ban pyntreikam ia ka Aiǹ ha ka snem 2022, ka seng ki nongdie madan ka MGSPHSVA ka la ȉatreikam lang bad ki bor ne tnat sorkar na ka bynta ban ȉada ia ki hok jong ki nongdie madan katkum ka Aiǹ.
Ka jingiashim bynta jong ka Seng MGSPHSVA ha ka Provisional Town Vending Committee ka long kaba shai kdar ba kane ka jingpynbeit kam pat dei kaba kut, hynrei ka dei tang ka jingpynkhreh lypa haduh kata ka sngi ba ka Sorkar kan thaw ia ka Town Vending Committee kaba pura ka ban sa trei ia ka kam ban jurip bniah ia ki ȉew tynrai, ki iew long hi, nangta kan kheiǹ jingkheiǹ katno ngut ki nongdie madan kin shong die jingdie katkum ka jingdon briew bad kan kdew ia ki jaka ba kin shong die jingdie bad kiwei kiwei de ki kam ba la pruid dak ha ka Aiǹ.
Ka MGSPHSVA kam don kano kano ka jingthmu ban pynthut ne pynwit ia ka jingpyntreikam ia ka Aiǹ. Hynrei ka angnud hir hir ba ka Aiǹ kan treikam bad ba yn lah ban pynbeit ia ka kam jong ki nongdie madan kaba la sah teng mynta la jan shi phew snem. Kumba ka ju long, ka Seng ka kloi ban ȉatreilang bad ka Sorkar, hynrei ka dawa ruh ba ka Sorkar lyngba ka Municipal bad Urban Department ba kin pynbeit shuwa ia ki kynrum kynram bad ki jingkynriang ha ka rukom pyntreikam ia ka Aiǹ kumba ka paw ha ki rai ba marwei shimet jong ka Municipal bad tnat Urban.
Ka Seng kan ym pdiang ia kine ki kam be-aiǹ kiba buh jingeh ia ki nongdie madan bad kan ym shah ba ki bor Sorkar kin khǹoit beiǹ ia ki nongdie madan bad ȉuhroit ia ki hok jong ki. Ka Seng kan ym shah ruh ba ki bor Sorkar kin pyndonkam bakla ia ka Aiǹ.
Ka MGSPHSVA ka la pynkhreh ruh ban buh hakhmat ka PTVC ia ka dur ka dar jong ki jaka shong die jingdie kiba khuid, kiba kylluid bad kiba itynnat. Ka seng ka la mynjur ruh ban kynriah sha ki jaka kiba biang bad ia kane yn lah ban leh hadien ka jingȉakren, ka jingȉapynbeit bad jingȉaralang ha ka PTVC. Ha kajuh ka por pat ka Sorkar lyngba ka tnat Municipal bad tnat Urban ki dei ban pynbeit shuwa ia ki jingduna bad ki kynrum kynram kumba ka Seng ka la kdew ha ki shithi bad jingujor jong ka.
Ka Seng kan ym shah da lei lei ruh ban weng ne pynkynriah jubor ia ki nongdie madan na Khyndai Lad. Hynrei ka Municipal bad tnat Urban ki dei ban pynbeit shuwa ia ki kynrum kynram bad ka dei ban pyndam shuwa ia ki Licence kiba ki la ai sha ki briew ki bym dei ki nongdie madan. Kane ka long katkum ka kyrwoh na u bah Shane Thabah, u General Secretary ka MGSPHSVA.
Pyrshah beit triang ki nongdie madan ban ym mih na Khyndai Lad
