Shillong: Ki sengbhalang bapher bapher ryngkat ki nongshong shnong ka Lapangap, West Jaintia Hills kila leit pynpra ia ka jingtei kaba la kynnoh ba wan skud jaka ki briew na Assam.
La kynnoh ba ki briew na Assam kila wan thung dieng ha katei ka jaka kaba la kam ba ka hap sha Meghalaya.
Ki la pynkhyllem bad wiangding ïa ka ïing ba la shna hapoh u pud u sam katei ka shnong Lapangap.
Ki paidbah ki la mih paidbah mynta ka sngi Balang ka 25 tarik Jylliew 2025 ha kaba ki la jynrat ia ki tynrai dieng ba la thung ha katei ka jaka jong ka Lapangap kaba khot ka Pynthor pdeñchynran bad pynkhyllem ruh ïa ka ïing sher dara.
La sakhi bad pahara lang ruh ki bor pynïaid district bad ki Pulit ha kane ka jingleit ki paidbah sha katei ka jaka.
Katkum ka khubor na ki pulit ka West Jaintia, ki paidbah kiba don kumba 400 ngut eiei na Lapangap bad ki shnong ba marjan kila leit jynrat ia ki tynrai dieng kiba la thung ka bor sorkar ka Assam ha ka jaka kaba don ka jingiakajia hapdeng ka Meghalaya bad ka Assam.
Halor kane, ki pulit kila pynpra noh ia ki paidbah na katei ka jingialum paidbah ban pynpra ia ki tynrai dieng.
Hiar ki paidbah bad sengbhalang sha Lapangap ban jynrat ia ki dieng ba wan thung ka Assam
