Shillong: Da ki hajar ki paidbah kila mih noh na Israel hadien ba ka Iran ka la pynjur ia ka jingther namding bad ki bomb sha ki nongbah ka Israel.
Kine ki paidbah kila hap ban kynriah noh sha kiwei ki ri ba marjan kum sha Cyprus, Europe bad kiwei.
Ki jhad ki la kit ia ki spah ngut ki briew sha ka kad duriaw ha Limassol jong ka ri Cyprus na ka jingiakynad kaba jur hapdeng ka Israel bad ka Iran.
Ki ri bapher bapher ruh kila leit shaw noh ia ki samla pule, bad kiba leit kai na ri Israel kynthup ka Poland, Latvia, bad Lithuania, Slovakia, Czech Republic.
Namar ba ka lynti suin ka Israeli ka dang khang, bun ki ri Europe ki leit shwa ia ki briew jongki da ki jhad.
Ka thma ka Israel bad ka Iran ka la iaid sha ka khyndai sngi, haduh mynta. Kine baroh ki dang ia khyrwit kawei ia kawei pat khlem sangeh satia.
Ka Iran ka la ther da ki ballistic missiles bad da ki cluster bomb sha ki nongbah ka Israel kum ka Tel Aviv, Jerusalem, Haifa, Beer Sheba bad ka la ai kyrteng ia kane ka jinghiar thma, kum ‘ka Khyrdop jong ka ding dujok ka plie ne ka The gate of Hell fire open’.
Katba ka Israel ka la ther ia ki ktem shipai, ki ktem shna tiar thma nuclear ha Fordow, Tehran, Isfahan, bad kiwei ki ktem shipai bad shlem shna tiar thma da kaba ai kyrteng ia kane ka jinghiar thma kum ka, ‘Jingkyrhuh u Sing ne The Rising Lion Operation’.
‘BA KYRHUH U SING’ BAD ‘PLIE KA DING DUJOK’: KA ISRAEL-IRAN, MIH DA KI HAJAR NA ISRAEL SHA CYPRUS, EUROPE
