Sohra: U SP ka East Khasi Hills District u bah Vivek Syiem ula ong ba uba pom nyngkong ia u Raja Raghuvanshi u dei u Vishal Singh Chauhan bad sa pom sa u Akash Rajput bad sa pyndep sa u Anand Kurmi.
Haba kren mynta ka sngi ka 17 t`arik Jylliew, 2025 u bah Vivek ula ong ba ha ka por ba ki pom, ka Sonam ka ieng kham shakhmat u Raja bad mar kumta u Vishal ula khyrwit nadien u Raja da ka wait dain bad kyang u Raja bad sa u Akash ula khyrwit hynrei namar ba khlem dei bha ka wait na jaka ba u thew, sa shim sa u Anand bad pom pynkut haduh ba un kyllon syndon bad ki bret ia ka met jong u Raja sha riat bad ki wait ar tylli.
“U Vishal u pom shwa da ka wait bad pom sa u Anand na bynta ka ryndang bad tyrpeng hynrei khlem ioh bha bad la pom sa u Akash bad ka Sonam ka nang peit bad phet sha dien ba ioh sngew ba lynniaw u Raja. Ia ka mobile jong u Raja la pynpait ka Sonam katba ia ka battery ot u Akash bad ia ka sopti lieh jong u kaba bit snam, u kawang sha riat”, la ong u SP.
Kila bret ruh ia ka sopti jong u Vishal ruh kila bret lang bad ki phet bak na katei ka jaka.
Ki pulit kila ialam ia ka Sonam bad kine lai ngut naduh Mawlakhiat ba kin batai ia ka jingiaid bad ieng.
Ki pulit kila iam ia kine sha jaka ba ki iaid bad pyniap ia u Raja hadien ba la dep ia ka jingtohkit Ha Parking ha Wei Sawdong, kumno ki ieng, ki wan sha katei ka jaka bad kumno ki pynieng bad pyniap ia u Raja bad ki ieng haei bad u Raja u ieng haei bad kumno u shah pyniap.
Na kane ka jaka kaba pyniap ia u Raja la ioh tam sa kawei ka wait kaba ki pyndonkam ban mait ia u Raja. Ka jingtohkit ka long kaba seisoh kumba la phla kine ki runar.
U SP ula iathuh ba ki thmu nyngkong ban pyniap iano iano bad sa thang ia ka met bad buh ia kata ka met ha ka scooty ka Sonam hynrei kane kam shym la urlong satia.
Ka Sonam ka don 3 tylli ki mobile phone bad ar tylli ka la bret bad kawei dang tohkit shaei ka buh.
U bah Vivek ula ong ba ka jingioh lad jongki ban pyniap ha kane ka jaka kam dei ba ki la plan lypa hynrei ka dei ka jingioh lad jongki ha ka por ba ki poi ha katei ka jaka namar ba kila plan naduh Indore, ban pyniap ia u Raja.
Watla hapdeng ka jingeh, ki pulit kila lah ban lapdien ia kane ka jingjia khamtam namar ba la jur ka jingtuklar na ki bor ba halor haduh ba ki pulit kim ioh thiah ioh dem shuh.
Mar ia pom nyngkong u Vishal ia u Raja, phet ka Sonam kham shadien ba lynniar u Raja
