Hapdeng ka jingiakynad kaba jur bad shyrkhei bha hapdeng ka Israel bad ka Iran, la mih shibun ki khubor kiba la kam ba u Prime Minister ka Israel u Benyamin Netanyahu ula plan ban pyniap noh ia u nongsynshar ba hakhlieh duh ka Iran, u Ayatollah Khamenei.
Ki lad pathai khubor kila kam ruh ba u President ka America u Donald Trump ula pynsangeh ia kane ka plan jong ka Israel ban pyniap ia u Khamenei.
Ha kajuh ka por, ka jingiather namding hapdeng ka Israel bad ka Iran ka la bteng bad nangjur mynta, katba ki ri ka pyrthei ki dang peitngor bha kliaw kaei kaban jia.
Kane ka jingiakynad ka Iran bad ka Israel kiba hap ha Middle East, ka la pyllong ia kiwei ki ri ka pyrthei ban peitngor, namar ba ka lah ban pur wat sha kiwei ki jaka lada ym lah ban tem kloi.
Ka Israel ka la kthong ia ki ktem shipai ka Iran da kaba ther da ki namding, ki drone bad kumjuh ia ki ktem shna bomb shna tuar thma ka Iran. Kane ka jingiather ka la iaid sha ka lai sngi kynthih bad ka jingther da ki namding, ki tup ki man, ki liengsuin iapom kam dei shuh tang mynmiet hynrei ha ka por myn sngi ruh.
Katba ka Iran ka la ther kylla ia ka Israel ha ki bynta ka Jerusalem bad Tel Aviv, kaa la wanrah ia ka jingiap ki katto katne ngut ki briew, ka jingmynsaw bad julor ki jingtei.
U Prime Minister ka Israel u Benjamin Netanyahu ula maham ia ka Iran ba ka jingther kan nang heh bad nang jur katba ka Iran ka la ong ba kan hap ban ther kylla na ka jingshah ther ha ka Israel.
Ka Israel ka la pynthikna ba u heh ka Islamic Revolutionary Guard Corps (IRGC)u Mohammad Kazemi bad Deputy u Hassan Mohaqiq kila kyllon iap ha u namding ka Israel.
Nang jur ka thma Israel- Iran, plan ka Israel ban pyniap ia u Khamenei
