Shillong: U SP ka East Khasi Hills u bah Vivek Syiem ula ong ba ka jingpynkhreh jong u Raj Singh Kushwaha bad ka Sonam Raghuvanshi ka dei naduh 11 sngi shwa ba ka Sonam kan iathoh shongkurim bad u Raja Raghuvanshi, kila iasylla ha Madhya Pradesh.
Ha ka jingphla jongki 5 ngut kiba shah kem, u SP u la iathuh ba la phah ia ki 3 ngut u Vishal Singh Chouhan, Anand Kurmi bad u Akash Rajput sha Guwahati ban pyndep ia u Raja hynrei kim shym la ioh lad satia bad dei hangne ba ka Sonam ka la thaw buit ban ialam ia u Raja sha Shillong bad ha ka por ba ki leit sha Nongriat, kila pynkhreh ban pyniap ia u Raja hynrei kim ioh lad namar ba ym don jaka bret ia ka met bad ynda la kiew na Nongriat kila thmu ban pyniap hapdeng ka shnong Mawlakhiat bad Wei Sawdong hynrei kim ioh lad satia.
Dei tad ynda kila poi ha parking Wei Sawdong ba kila ioh lad ban mait da ka wait ia u Raja uwei hadien uwei pat.
Nangne kila phet bak ha kaba ka Sonam ka la niah ia ka scooty bad kiwei bad la bret ia ka raincoat kaba phong u Akash Rajput la bret noh ha jaka peitkai hajan Mawkma bad ka Sonam ka la leit shong ha scooty ba niah u Akash bad ka scooty kaba buh ha Sohrarim la niah u Anand Kurmi.
Na Sohrarim ka la hiar bad phong da kawei ka sopti bad nakhmat Lad Mawphlang ka shong da kawei ka taxi haduh Shillong bad na Shillong ka leit sha Lokhra ISBT bad nangne ka shong bos shaduh Siliguri, nangne da kawei ka bos sha Patna bad na Patna sha Ara la shong da ka rel sha Lucknow bad na Lucknow ka shong da ka bos sha Indore.
Ka poi ha Indore ha ka 26 tarik naduh ka 23 tarik ba mih na Shillong bad hadien ba la mih khubor ba uwei na ki guide ula iohi ia ki 3 ngut kiba bud bad ka la sheptieng bad ka la mih da kali ban phet sha Siliguri ha ka kali kaba la pynbeit da u Raj, ba kan ai daw ba ka lait phet na ka jingshah batbor hynrei ha kane ka sngi, ki pulit ka Meghalaya ha ka 8 tarik mynmiet kila ioh kem ia u Akash Rajput bad u Raj ula ioh jingtip ba la don ki briew bym ithuh kiba kem ia u bad ula pyntip ia ka Sonam ba kan leit noh sha kano kano ka jaka, bad sa ong ba shah rahbor bad ka la lait phet bad ka donkam jingiarap.
U SP ula ong ba kine ki lai ngut kiba pyniap ia u Raja, kila kam ba ki shu iarap sngewbha namar ba ki dei paralok bad u Raj.
11 sngi shwa ban iathoh, la plan ban pyniap ia u Raja, dei ka buit u Raj u samla ka Sonam
