Shillong: Ki paidbah ka thain Sohra mynta ka sngi, ka 10 tarik Jylliew 2025, kila iamih paidbah ban pynpaw ia ka jingpynrem jur ia kito kiba kynnoh pynbudnam sniew ia ka thain hadien ka jingshah pyniap dusmon u nongwankai, u Raja Raghuvanshi ha katei ka thain.
Hynrei ha kajuh ka por, kila pynpaw ruh ia ka jingsngew lem ia ka mynsiem jong une u nongwankai, uba la shah pyniap dusmon ha ki runar.
La pyllong ruh ia ka jingiaid paidbah ryngkat ki jingthoh ban pyni sha ka pyrthei ba ki paidbah ka Sohra kim dei ki riew sniew khlem da tip ia ka jingshisha.
U Syiem ka Hima Sohra u Paiem Freeman Syiem ryngkat ki nongialam shnong, ki paidbah nongshong shnong ka thain, ki nongmihkhmat paidbah kila mih ban iaid rally ha kane ka sngi, ban pynpaw sha ka pyrthei ba ka Sohra kam dei kumba la mutdur ki briew nabar. Kane ka long kum ka jingpynphai jubab da ka jingsngew kum para briew, ym ka bniat namar ka bniat.
Hapdeng ka jingshah kynnoh sniew na kiba bun khamtam na kiba haïing hasem jong u Raja Raghuvanshi bad ki lad pathai khubor nabar halor ka jingshah pynïap utei u nongwan jngohkai pyrthei, ki paidbah ka thaiñ Sohra ki la jubab sha kiba haïing hasem bad sha ka pyrthei, ym da kaba sniew hynrei da ka jingieit bad ka jingsngewlem.
Ki paidbah ka thaiñ Sohra ki la ïashim bynta da ka jingthang mombati kum ka dak ka jingsngew lem ïa u Raja Raghuvanshi uba la shah pynïap ha ki riew thrang snam ïa kaba la donkti lang da ka lok jong u ka Sonam Raghuvanshi.
Shwa ban thang mombati, ki paidbah ki la ïashim bynta ha ka jingiaid paidbah da ka jingsuk ne peace rally ba la pynlong da ka hima Sohra, na ka ophis u Syiem shaduh Saitsohpen.
Ha kane ka sngi, la don ruh ki lad pathai khubor na ka ri, kiba la wan ban sakhi lang ia ka mynsiem bad ka jingburom ki paidbah ka Sohra bad ka Meghalaya ia ki nongwankai.
Pynphai ka Sohra da ka jingsbun bad iar jingmut hapdeng ka jingshah kynnoh sniew
