Shillong: Ka National Commission for Women (NCW) ka la shim sou moto halor ka jingmih khubor ba shah pyniap u Raja Raghuvanshi bad ka jingjah rngai ka lok jongu, ka Sonam, ha ka jingwan kai jongki hadien ba la dep iathoh sha Meghalaya.
Ka Commission ka la bthah iaka DGP ka Meghalaya ban aiti ia ka kaiphoh halor ka jingsuba ba ka don ka jingshalan briew sha Bangladesh khamtam hadien ba la lap ia ka raincoat bad ka jingdon ki briew bym ithuh kiba bud ia kine ki shijur.
Ka chairman ka NCW ka Vijaya Rahatkar ka la kyntu ia ka Director General of Police (DGP), Meghalaya, ban pynjur ia ka jingwad da kaba pyndonkam da ki buit kum u drone, ki ksew bad ka kynhun kaba tbit bha ha kane ka kam, ban wad ia ki lad baroh ban eksamin bad ki sakhi satar lyngba ka Forensic bad ban iatreilang bad ki bor sorkar pdeng lada donkam.
Ka la bthah ba kiba shah kynnoh dei ban kem mardor khlem pynslem bad dei ban aiti ia ka kaiphod hapoh 3 sngi.
Lah ban kdew ba u myntri rangbah ka jylla Madhya Pradesh u Mohan Yadav ula kyrpad ia ka tnad kam pohiing ban aiti tohkit ha ka Central Bureau of Investigation (CBI). Hynrei na ka liang u myntri ka sorkar jylla u bah Paul Lyngdoh ula pynpaw ba kumba long mynta ki pulit ka jylla kin leh hi ia kane ka kam bad la thung ruh da ka Special Investigation Team (SIT).
Hukum ka NCW ia ka DGP ban aiti kaiphod hapoh 72 kynta halor ka jingiap u Raja bad jah rngai ka lok
