Shillong: Ka Hima Sohra ka la pynkhreh ka rukom treikam lajong ha kaba iadei bad ka kam jngohkai khnang ban long kaba shngain ia kiba wankai bad ia kiba pdiang ia ki nongwankai.
Ka jingjia dang shen hadien ba ki shi kurim kila jah rngai, ka la pynkhih kyndit ia ka Hima bad mynta kan pyrshang ban pyntreikam noh kham kloi ia kane ka polisi. Kane ka polisi kan long kum ka SOP ne Standard Operating Procedure ia ki briew kiba wankai bad ia kito kiba seng kam kum ki Guest House, Home Stay, Restaurant, kiba shna jaka jngohkai, ha kaba kin ioh ia ka No Objection Certificate (NoC) na ka Hima bad kin bud ruh ia ki SOP.
U Syiem Khynnah ka Hima Sohra, u Paiem Marremdor Syiem ula ong ba ka Hima ka la pynkhreh ia ka polisi kum shi bynta ban iarap ruh ia ka sorkar ban tehlakam ia ki kam bymman. Kane ka polisi ka long kumno ban iatreilang ha baroh ki shnong, ki nongshong khamtam kiba iadei bad ka kam jngohkai.
Ha kajuh ka por, u nongai jingmut ka Hima Sohra halor ka kam jngohkai, u bah Allan West Kharkongor u la ong ba ka thong ka long ban pynbha ia ka kam khnang ba kito kiba wan kin sngew tynnad bad kin shngain bad kawei pat ka long ban iada ia ka mariang.
U la ong ba ha ka kam jngohkai, ka Sohra ka dei ka nongialam khmat ha ka jylla bad ki don 90 tylli eiei ki shnong hapoh ka Hima bad ka kam jngohkai ka jur bha hapoh ka Hima bad na kane ka daw, ka donkam bha ban pynjanai ia kane ka kam, kaba la ai ja bad pynriew spah ia ki nongshong shnong.
U la ong ba lada iai jia biang kumba jia ia u Raja Raghuvanshi uba la lap ia ka met na thain Wei Sawdong bad ka jingjah rngai ka lok jongu, kan ktah jur ia ka kam jngohkai ha ka thain Sohra.
Da ka polisi, pynkhreh ka Hima Sohra ban wanrah jingshngain ia ki trai shnong bad kiba wan kai
