Shillong: Ha ka step phyrngab kumba ha ka por 4 baje jong ka 8 Tarik mynta u bnai, ki dkhot ka Seng HYC Jatap bad Shella Area Unit ki lah ioh bat ia uwei u Bangladeshi katba kiwei kila lait phet, kiba rung tuh sha India lyngba ka khappud na Patharghat bad Kalatek kiba don ha syndah jong ka Indo-Bangla.
Katkum ka jingpyntip jong utei u Bangladeshi uba la ioh bat da ka seng, la ong ba ki don kiwei pat kiba wan ryngkat kila lait phet noh na katei ka jaka bad katto katne ki lah leit biang sha Bangladesh bad katto katne ki lah ban ioh rung sha India.
Ha ka jingkylli pyrthew na une u Bangladeshi uba lah ioh ban bat, u la iathuh ba udei napoh Bangladesh bad ha kane ka sngi u rung sha India ban iarap ban pynrung tuh ia ki briew shapoh India bad ban leh ki kam khaii tuh ia ki tiar ki tar ryngkat ki ar ngut ki Nong India kiba shong ba sah ha ka Shnong Kalibari kiba kyrteng u Bono Biswas bad u Subash Baidya.
Une uba shah bat, ula phla ba u ioh kumba 1000 tyngka na uwei u ne kawei ka briew ba u ioh ban pynrung tuh sha India. Ka kamram jong u ka long ban pyllait ne ialam lynti ia ki briew na ka jingker kiba don ha khappud bad hadien kata kin sa wan shim kitei ki ar ngut ban ialam sha Shillong bad kiwei ki jaka.
Katkum ka jingiathuh jong une u Bangladeshi, ka jingpynrung ia ki briew na Bangladesh sha India lynga ka Khappud ha ka thain Shella ka la iaid mynta shibnai tam bad man ka miet kumba 10 ngut ei ei ki Bangladeshi ki ia pynrung sha India ba kynthup ruh ia ki kynthei bad tang ma u ruh u la pynrung kumba 50 haduh 60 ngut ei ei ha kine ki khyndiat sngi ba la dep.
Na ka liang ki Nongialam ka Seng ki la leit ban aiti ia utei u briew sha ki pulit ka Shella Police Station bad dawa ba dei ban shimkhia ban pynlong ka jingtohkit kaba thikna halor ki jingphla jong utei u Khar Bangla bad ban kem ruh ia ki Dalal na India kiba la pynpaw kyrteng ma u.
Ka Seng ka kyntu ruh ia ki bor pulit bad ki Shipai BSF ba kin shimkhia bha ia kane ka kam khnang ban lap ia baroh kiba donkti ha kane ka kam khaii briew lyngba ka khappud bad kumjuh ruh ban lap bad kem ia baroh ki briew kiba lah wan rung tuh shapoh India katkum ka jingpynpaw jong utei u Khar Bangla.
Ia kane ka jingjia la pyntip ruh sha u SP ka East Khasi Hills bad SDPO, Sohra Sub-Division bad sha ki heh ka BSF Meghalaya Frontier na ka bynta ban shimkhia ia kane ka kam, la ong ka kyrwoh na u Pyndap Shongwan, President HYC-Jatap Unit.
Bat ka HYC ia u Bangladeshi ba la pynrung briew kumba 50 ngut sha india, bad kamai 1000 uwei u briew
