Shillong: Ka BJP ka la ong ba ka sorkar Meghalaya ka la dei ban pan jingiarap noh na ka sorkar India ban wad ia ki shi kurim kiba la jah rngai haduh mynta ha ka thain Sohra.
U general secretary ka BJP u bah Wankitbok Pohshna ula ong ba ka sorkar jylla ka dei ban pan jingiarap na ka sorkar pdeng ha kaba iadei bad ki bor pulit, bor shipai bad kumjuh ki tiar teknoloji kiba khlain katkum kane ka juk mynta ban wad ia ki shi kurim na jylla Madhya Pradesh.
U bah Wankit ula ong ba ka la donkam ia ka jylla ban pynkhlain ia ki tiar juk stad katkum kane ka juk.
U la ong ba ka BJP ka la ai jingmut ban leh rejister ia baroh ki kam kiba iadei bad ka kam jngohkai lyngba ki tnad sorkar, ban pynsuk ia ki nongwankai ban rejister da ka juk digital.
Ula ai jingmut ruh ban buh CCTV ha baroh ki hotel, bad ki guesthouse ban rekod ia kiba rung kiba mih, ban pyndonkam ruh da u Wi-Fi lane satellite ha police outpost bad ha ki tourist information centre ha ki jaka nongkyndong.
Lah ban kdew ba ka jingwad jong ki pulit ryngkat ka State Disaster Response Force ryngkat ka jingiatreilang ki nongshong shnong ka thain Sohra ka dang iaid haduh mynta.
Ka sorkar jylla ka la pyndonkam ruh da ki pulit Special Operations Team (SOT) bad ki ksew K9 nalor ki drone ka NESAC (North Eastern Space Applications Centre).
U Raja Raghuvanshi (29) bad ka lok, ka Sonam Raghuvanshi kila jah ha ka thain Sohra naduh katei ka sngi 23 tarik Jymmang ba la dep.
Ka jingwad ka la iaid sha thain Dewlieh, Sohrarim, Nongriat, Mawsahew, Mawlakhiat, Laitduh bad kiwei ki jaka.
Pan jingiarap noh na ka sorkar India, ban wad ia ki shi kurim, ong ka BJP ia ka sorkar jylla
