Twa u lum harum Laitlyngkot bad ha Umtyngar sahkut ka leit ka wan sbak

Shillong: Ka jingther u slap ha kine ki 2-3 sngi ka la wanrah ia ka jingtwa ha surok Shillong-Pynursla haduh ba ka la wanrah ia ka jingthut ia ka leit ka wan.
Mynta ka step ka sngi Thohdieng, ka la don ka jingtwa u lum harum Laitlyngkot haduh ba la khang lynti ia ka surok bad ka la pynsahkut sbak ia ka leit ka wan ki kali, kiba la ia beh ban kiew sha Shillong ban pyndep ia ki jingdonkam.
Kane ka jingtwa u lum, ka dei na ka jingtih surok kaba dang iaid mynta. Hynrei kam shym la don ka jingmynsaw namar ba ki briew kila husiar lypa na ka jingitieng ba lah ban twa na ka jingther u slap.

Lah ban kdew ba ka SDO Pynursla ka la pynmih ia ka jingpynbna kham mynshwa ban khang iaid kali naduh 8-11am bad 1-4pm naduh ka 26 tarik haduh ka 30 tarik mynta u bnai Jymmang 2025, khnang ban pynsuk ia ka kompeni shna surok ban pyndep ia ka kam kham sted.
Ka SDO ka la madam ruh ia ki paidbah ban long kiba phikir ha ka leit ka wan sha katei ka surok Shillong-Pynursla-Dawki namar ba ka lah ban buh jingma na ka jingsynjor ki maw, ka khyndew ha kane ka por slap.
Ha kawei pat, la ioh jingtip, ka la don ka jingtwa ruh ha Umtyngar ha kaba ka la don ka jingshah syllad ka iing tangba kam shym la don ka jingmynsaw namar ba ki briew ki la husiar lypa. Ka jingpynkhuid iaka twa ka dang iaid haduh mynta.