Shillong: Ka KSU Vairengte Circle, Kolasib District, Mizoram ka la pynlong ia ka Cultural Meet cum Academic Award ha ka 24 tarik u Jymmang 2025 ha Vairengte Community Hall, Kolasib District, Mizoram hajan ka shnong Khasi Veng, kaba dei ka shnong ba la shong la sah da ki Khasi naduh hyndai hynthai ha shwa ban kha ia ka jylla Mizoram lane Meghalaya bat wat ia ka Assam.
Ka jingthmu jong ka KSU Vairengte Circle ban pynlong kum kane ka lympung ka long ban lum ban lang ia baroh ki Khasi kiba la shong la sah naduh mynshwa ha ka jylla Mizoram bad ban ai mynsiem ia ki khynnah pule Khasi ba kin shim khia ia ka pule puthi kaba long ka atiar ban kyntiew bad iada ia ka Jaidbynriew Khasi ha jylla Mizoram.
Ha kane ka lympung la wan ia shim bynta da baroh ki Khasi ba la shong la sah ha Mizoram kiba kynthup ia ki Khasi ba sah ha ki shnong Khasi Veng, ha Phaisen bad ha Saipum. Baroh kine ki shnong ki dei kiba dang hap ha ki thaiñ nongkyndong bad ki long kiba sahdien ha ka liang ka ïoh ka kot.
Ki Khasi ba long trai shnong ha Mizoram ki don kumba 115 longiing ha kaba kumba 80 longiing ki don ha Khasi Veng (Veng ka mut shnong ha ka ktien Mizo). Ki don kumba 500 tam ngut ki Khasi bad jan baroh kim im ja da kaba rep tympew bad kwai.
Ka KSU ka la pynkha ia ka KSU Vairengte Unit ha u snem 2019 hadien ka jingshah thombor ki nongrep Khasi ha kiwei pat ki Jaidbynriew heh paid bad lyngba ka KSU Vairengte Unit bad ka Khasi Welfare Committee Vairengte la lah ban pynbeit ia ka jingiakynad lyngba ki jingiakren bad jingiasyllok bad ki heh paid Mizo.
Ha kane ka lympung ba la pynlong da ka KSU Vairengte Circle, la khot sngewbha ia u B. Lalchhanzova uba dei u myntri u ba peit ia ki tnad Land Revenue & Settlement bad Food, Civil Supplies & Consumers Affairs kum u kongsan. La don lang ruh ia u samla Donald V. Thabah, General Secretary ka KSU bad ia u H. Vanlalbiakzuava, SDO Vairengte Civil Sub-Division kum ki symbud kongsan.
La pynkup burom ia 9 ngut ki samla pule Khasi kiba hapdeng ka jingshem jingeh ki la lah ban pyndep ia ki jingpule ki jong ki. Kine ki samla pule ki kynthup ia 9 ngut.
Ka KSU ka la ioh ban ia syllok kyrpang ruh ia u myntri ka sorkar Mizoram u B. Lalchhazova halor ka jingsahteng ban ai ia ki Land Settlement Certificates ia ki longiing Khasi kiba la sah naduh hyndai ha katei ka thaiñ. Kum ban shu pyntip, ki Khasi wat la ki la sah naduh hyndai ha Vairengte kum ha ki shnong Khasi Veng, Phaisen bad Saipum hynrei kim pat ioh ia ki kot patta lane kot jaka na ka sorkar Mizoram. Ka KSU ka la khyllie biang ia kane ka mat ha khmat utei u myntri bad une u myntri u la kular ba shen ka tnad ba dei peit ka jong u kan sa shong bad bishar halor kitei ki jingangnud ki Khasi ba sah ha Mizoram.
Kane ka long ka kyrwoh na u Andrew Dkhar & Paul Pajat, President & GS KSU Vairengte Circle
Kolasib District, Mizoram.
115 ki longïing Khasi basah naduh hyndai ha Mizoram, dawa ka KSU ban ai patta khyndew| ai burom ia ki samla pule
