Shillong: U Mukesh D. Ambani, u Chairman & Managing Director, Reliance Industries Limited ula pynbna ba ka Reliance Compeni kan theh pisa T.75 hajar klur ha kine ki san snem na ka bynta ban kyntiew ia ka North East ha ki bynta bapher bapher.
Ia kane ula pynbna ha ka jingialang bah ki nongseng kam ha ka phang RISING NORTHEAST INVESTORS SUMMIT 2025 kaba long ha Delhi mynta ka 23 tarik Jymmang, 2025, ha kaba la don lang u Myntri Rangbahduh ka ri u Narendra Modi bad baroh 8 ngut ki Myntri Rangbah ki jylla ka North East kynthup u Conrad K Sangma.
U Ambani ula ong ba ki 8 tylli ki North-East la ju khot ruh kum ASHTA LAKSHMI kaba mut ka shlem jong ka jingsuk jingsain, ka jingitynnad bad ka jingroi parum pareh.
Ula kular 6 tylli ki mat ban bei ha North East. U la ong ba ka Reliance ka la bei T.30,000 klur ha ki 40 snem bad ha kine ki san snem ban wan, yn bei pisa T.75,000 klur, kaban pynmih kam palat 2.5 million tylli na ka bynta ki 45 million ngut ki nongshong shnong ka North East.
U la ong ba ka Jio ka la don kiba pyndonkam 90% kynthup 5 million ngut kiba pyndonkam ia ka 5G. Ula ong ba ka Jio kan wanrah ruh da ka bor jong ka Artificial Intelligence sha baroh ki school, hospital, ki karkhana bad ki rympei iing.
Ka Reliance Retail kan kyntiew ruh ban bei ha ka kam, ki soh ki pai, bad ki jhur ban kyntiew ia ki nongrep bad yn bei ha ki karkhana kiba shna jingbam kum ki FMCG.
Yn bei ruh ban kyntiew ia ka jingpynmih ding na ka sngi ha kane ka thain bad yn seng ne wanrah 350 tylli ki Compressed Biogas plant.
U la ong ba ka Reliance Foundation kan ai ruh ka jingsumar kaba bha ia kiba pang bampong bad halor kane la sdang ban bei ha ka hospital kaba 150 jingthiah ha cancer hospital ha Manipur, nalor ka jingiatreilang bad ka Mizoram University ha ki lad sumar ia ka jingpang bampong ki buin.
Ha Guwahati, la tei ia ka Advanced Molecular Diagnostics and Research Lab bad yn pyllong ia ka North-East na ka ktem jaka sumar sha ka shlem wad bniah.
Bad kaba khadduh kaba ula kular ka long ban bei ha ka jingialehkai ban pynmih ia ki nongialehkai kiba kynsai ha ka pyrthei na North East bad kan iatreilang bad ki jylla ban buh ia ki Olympic Training Centre.
T.75 hajar klur yn wan theh pisa u Ambani ha Nort East ha ki san snem
