Shillong: Ar ngut ki ophisar heh na ka Ministry of Education ba kynthup ia u Additional Secretary u Sunil Kumar Barnwal bad u bad u Director Jong ka Higher Education u Subrat Kumar Pradhan ki la wan poi top ha SkulBah NEHU ban eksamin ia ka jinglong jingman jong kane ka skulbah kaba la don hapdeng ka kynrum kynram la bun bnai.
Kine ki heh ka sorkar India kin iakynduh ia ki nongpyniaid ka SkulBah NEHU bad kumjuh ruh ia ki nonghikai, ki samla pule bad kiwei kiwei ban eksamin ia ki daw kiba la wanrah ia ka huri hura bad ka kynrum kynram bad ban pynbeit ia ki.
Kane ka jingwan jongki, ka long hadien ba ka Acting Vice Chancellor ka Prof. Sherwin May Sungoh ka la khot pyllong ia ka Academic Council kaba 113 hynnin ka sngi, wat hapdeng ka jingbyrngem u Vice Chancellor u Prof. Prabha Shankar Shukla, uba phet shabar ka jylla na ka jingiakhih ki nonghikai, ki samla pule pyrshah ia u.
Kine ar ngut ki ophisar ka sorkar India kin pyllut por baroh shi sngi ha NEHU ha kaba ki la sdang ia ka jingkynduh ia ki kynhun bapher bapher naduh ka por 10 baje mynstep haduh 4 baje janmiet. Kin iakynduh ia ki bor pyniaid ka NEHU, ia ki Deans bad Head of Department, kin kynduh ia ka NEHUTA, NEHUSU, NEHUNSA, bad kin leit jngoh ruh ia ki tnad jingpule bapher bapher jong kane ka skulbah.
Wan poi 2 ngut ki heh ka sorkar India ban eksamin ia ka NEHU
