Shillong: Ka jingiakynad ka lah ban orpait thiaw hapdeng u heh shipai Army Chief General u Waker-Uz-Zaman bad u Chief Adviser ba shipor ka ri Bangladesh u Muhammad Yunus hadien 8 bnai ba la khyllem ka sorkar kaba ialam ka Sheikh Hasina kum ka Myntri Rangbahduh ka ri.
Ha ka khubor kaba dang jia kynsan, ka jingiakynad ka la sdang paw hadien ba ka sorkar ba shipor ba ialam u Md Yunus ka la khein beain ia ka party ka Awami League jong ka Prime Minister barim ka Sheikh Hasina kaba hap phet krad khyndai bnai mynshwa na la ka ri na ka jingshah kthong ha ki paidbhur.
U Army Chief General ka Bangladesh Waker-uz-Zaman um shym la iahap jingmut ia ka rukom treikam u Md. Yunus ban shah tuklar ha ki ri kiba nabar bad ula kren da kaba tyngeh ia u Md. Yunus ba u dei ban pyllong noh ia ka elekshon kloi ban jied ia ka sorkar da u paidbah.
Ka thymmei khubor ka la ong ba u heh shipai ka Bangladesh u kham noh mynsiem bad ka India. Ha ka jingshisha, utei u heh shipai u don ka jingthmu ban wanrah lang ia ka parti jong ka Sheikh Hasina bad ka Khaleda Zia ban ialeh ia ka elekshon khnang ba ki paidbah kin ioh ban jied katkum ka mon jongki hynrei ka sorkar u Yunus ka la khein beain noh ia kane ka party ka Sheikh Hasina, kaba la wanrah ia ka jingkynad hapdeng une u heh shipai bad u chief Adviser.
Kawei pat ka jingiakynad ka mih hadien ba u Md. Yunus ula thung ia u Khalilur Rahman uba sah ha America kum u National Security Adviser, kaba ktah ia ka jingsngew jong u Zaman kum u heh shipai namar ba la iaid lait khlem iasyllok ia u.
Ka jingiakynad ka la nang paw haba u Lieutenant General u Mohammad Faizur Rahman, uba dei u Quartermaster General (QMG), u iakynduh ia u heh ka Inter Services Intelligence (ISI) ka Pakistan u Lieutenant General Asim Malik, bad ki la iaid lait ia u heh shipai u Zaman bad kane ka la wanrah ka jingpun kaba sniew ha ka tnad shipai katei ka ri. Ha kane ka jingiakynduh jongki, ka la don ruh ka jingbuh thong ban wanrah ia ka jingpynkulmar ha North East ka India bad ban rung beain.
U Zaman ula maham ruh ia u Yunus ba ka lah ban mih ka jingialeh pyrshah hapoh ka tnad shipai kaba lah ban buh ka jingma ia ka bor bad ka jinglaitluid ka ri.
Katkum ka khubor, ka jingiakhluit hapdeng heh shipai Army Chief General u Waker-uz-Zaman bad u Interim Chief Adviser u Muhammad Yunus ka la poi sha ka jingthnam syndon.
U heh shipai u General Zaman uba la thmu ban leit sha U.S.A ruh, ula pynsangeh noh na ka jingiakynad kaba la pdung ha katei ka ri.
U General Waker-Uz-Zaman ula phah ia ka khubor kaba tyngeh sha u Md. Yunus ha ka jingialang ki shipai ha kane ka sngi Balang, ba u dei ban pyllong noh ia ka elekshon ha u Nohprah mynta u snem, nangta ban sangeh ban tuklar ia ki kam jong ki shipai bad ban iasyllok ia u heh shipai halor ki mat kiba kongsan jong ka ri.
Kane ka jingialang ka la phah ia ka khubor ba lada u Md. Yunus um sangeh ban leh buit sianti, ki shipai kin leh ia kaba donkam ha kaba u President un pynbna da ka Emergency ban pynkut noh ia ka jingsynshar u Yunus, khnang ban pyllong ia ka elekshon.
Pyllong elekshon noh ha u Nohprah ne ka Emergency, phah khubor ki shipai sha u Adviser ka Bangladesh
