Shillong 21, Jymmang: Ka jingwan ka aiom lyiur ka wanrah ka jingsyier ia ka iaid ka ieng ha ka surokbah National Highway-40 Shillong-Pynursla-Dawki namar ba ka don ha ka jingpynheh.
Ka bynta jong ka surok narum Laitlyngkot ter ter haduh Wahlyngkhat ka dei kaba kham khim bha mynshwa bad kaba jylliew ki riat ki rain. Bunsien ki maw, ka khyndew ka hap ka twa ha ka por slap khamtam mynta ba ka kompeni ka dang tih ia ka surok ha kaba ki maw, ka khyndew ki shong synjor.
Dang hynnin ka sngi, ka 20 tarik Jymmang, 2025, ka khyndew ka la twa bum ha Khohiar hajan ka lad sha shnong Mawkhap. Kawei ka kali ruh ka la shah syllad ha u maw ba hap katba ka dang iaid ha surok. Ka jingtwa ka khyndew ka la wanrah ia ka jingthut ha ka leit ka wan ki kali tangba ki pushilum kila lah ban pyllait pat kham hadien.
Ka don ruh ka jinghap ki maw bah bad ka khyndew shwa ban poi ha shnong Pomlum. Ka bynta na thain Rngain shaduh Mawlieh ka kham syier bha namar ba ka jingtih surok ka kompeni, ka la pynshong synjor ia ki maw kiba lah ban hap haba jur slap. Ka jingtap lyoh ba rben ka la nang pynsyier ia ki kali namar ba wat ka ding kali ruh kam lah ban ksam ia u lyoh khamtam ha ka por mynmiet.
Kumta, ki briew ki dei ban husiar bad kham phikir haba ki iaid sha katei ka thain ha ka por slap. Ynda la dep ban shna ia kane ka surokl Two Laning, khlem pep kan pynsuk bad pynaram bha ia ka leit ka wan jong ki paidbah sha katei ka thain.
Hap phikir sha surok Rngain, Pynursla por slap nalor ka twa, shah tap lyoh ka surok
