Shillong: Ka shad Khasi jong ka shnong Mawlongbna kaba hap ha Hima Mawsynram lehse, ka dei kaba rim bha ha kane ka ri Khasi. Ia kane ka Shad la pyllong man u snem ban ainguh aidem ia u nongbuh nongthaw ban ai ia ka bha ka miat ha ka rep ka riang, ha ka koit ka khiah bad ha ka kamai kajih.
Haba batai halor kane ka shad, u rangbah Dansing Pdahkasiej uba dei u Adviser ka Seng Khasi Mawlongbna, u la iathuh ba hyndai ha kane ka jaka, la don uwei u tymmen riewhok u parad Dormi Pdahkasiej uba lah ban pynkoit ia baroh ki jingpang tang da ka um kaba leit tong na krem ha ka por 4 baje mynstep bad thaba kwai bad ki briew kila koit phar ka jingpang.
Ka jingsdang ka shad ka dei hadien ba u rangbah Sib Charan Roy ula leit sha Dhaka ban leit wad nongsumar ia ka jingpang bad ha kata ka por, ula iakynduh ia ki para shnong ka Mawlongbna kiba leit iew shathie, kiba la iathuh ia u ba u don u tymmen riewhok uba lah ban sumar ia ki jingpang da kaba shu ai da ka um dawai bad thaba kwai.
Khlem da pynslem, u rangbah Sib Charan Roy ruh ula wan wut wut ban shah sumar ha u tymmen riewhok u parad Dormi Pdahkasiej bad ula ioh syndon ia ka jingkoit bad, naduh kata ka por, u rangbah Sib Charan ula don bynta syndon ha ka jingpyllong ia ka shad ka kmen ha shnong Mawlongbna.
U rangbah Dansing u la ong ba katkum ka jingthoh, ka shad ka dei ha u snem 1932. Kane ka shad suk mynsiem ka dei ban ainguh ia u blei nongbuh nongthaw bad ha kane ka shad la shim bynta tang kiba don ha ka niam tynrai. Ki don 70 percent ki nongshong shnong ki dang ksoh ha ka niam tynrai hynrei ka don ka jingiatreilang jong baroh kiba dei na kiwei ki jingngeit ruh ha imlang sahlang.
Ha kane ka thain Mawlongbna, ka Seng Khasi ka la nang khlain watla bun kiba la don ha ka jingngeit jong kiwei ruh.
Ha kajuh ka por, u Secretary ka Seng Khasi Mawlongbna bah Shonshap Synrem ula ong ba shwa ban pyllong ia ka jingshad, la pyllong ia ka jingainguh ai dem, ha kaba ka mariang ka sngew ka sngap ia ka jingud jingnam ban ai ia ka sngi kaba shit kaba shai bad kaba rang.
Katba u Syiem ka Hima Mawsynram, u Paiem Amos Malngiang ula ai ka jingkyrshan ia ka seng Khasi Mawlongbna kaba dang pynneh pynsah ia ka riti dustur jong ka jaitbynriew.
Ka Seng Khasi Mawlongbna ka la pynkut ia ka shad mynta u snem 2025 ha ka 18 tarik Jymmang hadien lai sngi kynthih, da ka jingiphuh iphieng bad shongkun da ka jingiashim bynta shitrhem ki nongshad kynthei bad shynrang.
Na u nongsumar ba tong da ka um 4 baje mynstep, sdang ka shad ha Mawlongbna
