Shillong: U Myntri Rangbah ka jylla u Conrad K Sangma ryngkat u Symbud Myntri Rangbah bah Prestone Tynsong, u myntri tnad jngohkai bah Paul Lyngdoh mynta ka sngi ka 19 tarik Jymmang,2025 kila jurip ia ka Iewduh, kawei na ki iew kaba heh tam bad kaba rim ha ka jylla.
La synran lang u Syiem ka Hima Mylliem u Paiem Ainam Manik Syiem, ki myntri bad ki heh sorkar.
Ha kane ka jingjurip u Conrad ula rung sha ki lynti sha Iewduh ban peit ia ka jinglong jingman jong kane ka iew. Hynrei ha kane ka por ba u iaid kjat, la wan ruh u slap bad kila jhieh ruh.
Ka jingleit jurip ka long naduh Motphran ter ter shaduh Khliehiewduh. Ha lynti u myntri rangbah ula iakren bad ki nongshong iew bad ula ai khublei ruh ia ki.
Dang shen, u myntri rangbah ula pynbna ba ka sorkar jylla ka la dep mang pisa sa T.15 klur nalor kaba la dep ai T.6 klur ban pynbha ia kane ka iew u Khasi hyndai.
Ha kane ka jingleit jngoh, u myntri rangbah ula krih baroh ki basa kiba don ha iewduh naduh ka basa jhur iew dielang, shaduh basa dohkha, basa doh, bad kiwei. Ula bam ja doh ruh ha ka dukan ha Iewduh, u la kup knup bad kiwei ki jingiakren jongu bad ki paidbah. Ha Iewdialang ki nongshong iew kila ai sngewbha da ki jhur ha u shang bad ula iakren bad ki nongiew ha kaba ula hukum ia ka MeECL ba kan pynbiang ding noh ha katei ka basa dielang kumba la pynpaw ki nongshong iew.
U Conrad ula pynbna ba nalor ka T.6 klur kaba la pyntrei mynta ban pynbha ia ka lynti iaid ha Iewduh, ka sorkar ka la mang ruh sa T.15 klur ban pynbha shuh ia ka Iewduh khamtam ka jingpynbha ia ki nala, ki jingpyniaid ia ki paip um.
Ki Jingjia Ba Khampher Ha Ka Jingleit Iuhkjat U MR U Conrad Ha Iewduh
