Shillong: Ka shnong Wahkhen kaba ju bna nam kum ka shnong ka put ka tem tynrai u Khasi, bad ka pneh ka Lariti ka la ioh ia ka jingithuh na ka sorkar jylla Meghalaya.
Ka sorkar jylla ka la mang T.40 klur ban tei ia ka Indigenous Music Centre ha Wahkhen kaba hap ha Pynursla Block. Kane ka Centre kan iadei ruh bad ki kam jngohkai pyrthei, na ka bynta kyntiew ia ka spah ka lariti ne kolshor jong ka jaitbynriew bad ruh ban khring ia ki nongwankai.
U Myntri Rangbah ka jylla u Conrad K Sangma ula pynbna ia kane mynta ka sngi ka 17 tarik Jymmang 2025 ha ka jingialang kaba long ha shnong Wahlyngkhat.
U myntri rangbah u la ong ba kane ka shlem tynrai ha Wahkhen kan ym long tang ka jaka hikai tem hikai put, hynrei kan long ka jaka jngohkai, ka jaka wad bniah. Kan don ka jaka hikai tem, ka studio, ki jaka sah ki briew kiba wan bad kiwei kiwei.
Kumba long mynta, ka Wahkhen ka la don ka Sieng Riti Institute kaba la seng naduh u snem 2002 da ki duhalia bad ki rangbah ban kyntiew ia ka put ka tem bad ka riam ka beit bad ka kolshor jong u Khasi.
T. 40 klur ka Indigenous Music Centre ha Wahkhen, pynbna u Conrad ha Wahlyngkhat
