Shillong: Ka India ka la pynher 15 tylli u namding Brahmos ban pynlko ia ki ktem shipai suin ka Pakistan ha ka jingiakhun dang shen.
Une u namding u lah ban her ha ka jingsted kaba 3700 km ha ka shi kynta, kaba mut shi kynta u lah ban heh naduh Shillong shaduh palat ia ka sor Mumbai ruh, ha kaba ka jingsted jongu ka kham palat ar shah ban ia ka jingsted jong ka jingsawa ne ka sound. Ia une u namding la shna ka India ryngkat ka jingiatreilang bad ka Russia, ha kaba la test nyngkong ia une u namding ha ka snem 2001.
Ki don 11 tylli ktem ha Pakistan kynthup ka radar ki la lko ha kane ka jingther ka India ha ka 9 bad 10 tarik u Jymmang, 2025. Ki ktem ka Pakistan kiba shah pynpra ki dei ha Nur Khan Air base, Rawalpindi, Sargodha, Chakwal, Rahim Yar Khan, Jacobabad, Sukkur, Bholari, Shorkot, Mushaf Air Base bad Sheikh Zayed International Airport.
Ka India ka pyntreikam da ka Operation Sindoor ha kane ka jingther ia ki ktem ka Pakistan khamtam ha kito ki jaka kiba shna ktem ki riew pyntriem ne ki terrorist.
Ka India ka la shim ia kane ka sienjam hadien ba 26 ngut ki nongleitkai kila shah siap iap ha ki lehnoh ha ka 22 tarik Iaiong ha Pahalgam, Jammu and Kashmir.
Nalor u namding BrahMos, ka India ka pyndonkam ruh da ka Sukhoi-30 MKI, u namding Akash ban siat pynhap ia ki drone ka Pakistan, bad u namding Barak-8 ban pynpra ia ki ktem ki riew pyntriem ha Pakistan Occupied Kashmir bad ha ki ktem shipai.
Pynher ka India 15 tylli ki namding Brahmos, lko pom 11 tylli ki ktem shipai ka Pakistan
