Shillong: Ka KSU Delhi mynta ka 14 tarik Jymmang, 2025 ka la ioh ban pyllait im ia kawei ka samla Khasi kaba la shah ialam sha ktem awria ha nongbah Delhi.
Haba pyntip ia kane, ka nongialam ka KSU Delhi ka samla Marbiang Khongwir, ka la iathuh ba mynta ka janmiet, ka seng ka la ioh jingtip da ka phun na kane ka samla kaba la pyntip ba ki la don ki briew kiba mut ban shoh ia ki bad mar mar ki dkhot kila leit sha katei ka jaka ryngkat ki pulit ka Delhi hynrei ynda la poi ha katei ka jaka, bad hadien ba la kylli tohkit na kane ka samla, ka la iathuh ba ka la shah ialam sha ka ktem awria ban die met.
Mar mar, kila leit sha kane ka iing ba kane ka samla ka la shah ialam kaba don kita ki briew kiba thmu kam awria ia ka hynrei ki la kloi noh ban phet na katei ka jaka shwa ban poi ki dkhot ka KSU bad ki pulit watla kila tied shiteng kynta ia ka jingkhang ruh. Namar ba kim lap ia kita ki briew, la aiti noh ha ki pulit bad la buh ia kane ka samla ha jaka ba shngain bad yn sa pynpoi noh sha Shillong ynda la phah ki pulit.
Kane ka samla Khasi ka dei na thain East Jaintia Hills District.
Shah ialam ka samla Khasi sha ktem awria ha Delhi, pyllait im ka KSU
