Shillong: Mynta ka sngi, ka NPP Farmers’ Wing ka la ai jingmut ia ka sorkar ba kan thied synsar shuh khambun ia ka kilo ban thied na ki nongrep namar ba kumba ka long mynta ka sorkar, ka thied tang 800 kilo na uwei u nongrep bad ki don ki nongrep kiba don 1000 haduh 2000 kilo kila hap ban leit die tad biang ia uba tam sha iew.
Halor kane, ka NPP mynta ka la kynduh ia u symbud myntri rangbah bah Prestone Tynsong ba ka sorkar kan pyrkhat biang ban thied shuh khambun u synsar ym tang 800 kilo khnang ba kito kiba don bun kilo ki kham lait na ka jingkhuslai bad ban pynkiew ruh ia ka dor synshar.
Haba kren sha ki lad pathai khubor, u bah Himalaya Shangpliang ula ong ba ka party ka la kyntu ia ka sorkar ba kan pyntreikam bha ruh ia ka CM Assure Scheme namar ba ki don ki jaka ba kam shym la pyntreikam bha ha kaba bun ki nongrep kim pat tip ia kane ka skhim bad kane ka la pynduh lad ia ki nongrep ban ioh ia ka jingiarap na kane ka skhim.
U bah Himalaya ula ong ba la kyntu ruh ia ka sorkar ba kan phah ia ki saiantis ban wad bniah ia ka jingiap khlaw u kwai bad ban thaw lad ban buria ia ka jingduh jong ki nongrep.
Ha kajuh ka por, ula ong ba ka NPP Farmers’ Wing ka la sngewnguh ia ka jingshim khia ka sorkar ban pynioh ia ka sboh ban sam sha ki nongrep. Ka la kyntu ruh ia u bah Prestone ban buddien ia ka skhim sam khun sniang, khun syiar namar ba ka la jah mynta. Ka sorkar ka dei ruh ban pynbiang ia ki nongtrei ki doktor ha ka tnad ri jingri khamtam sha jaka nongkyndong khnang ba ki nongri jingri kin ym kynduh jingeh haba ki leit donkam ban wad jingiarap na ka ophis.
U bah Himalaya ula iathuh ba la pynsngew ruh ia ka jingeh ki nongrep namar ba kim ioh symbai thikna haba leit mih sha ophis ka tnad ka rep ka riang.
Phah thied shuh ka NPP ia u synsar na ki nongrep ba duna palat tang 800 kilo
