Shillong: Ar ngut ki nonghikai ne contractor ban pynher dron na ri Turkey kila iap lang ha ka jingther bom ka India da ka Operation Sindoor ia ka Pakistan ha ka jingiakhun dang shen, bad kane ka la pynpaw ba ka Turkey, ym tang ba ka iarap ia ka Pakistan ha ka thma pyrshah ia ka India da kaba phah da ki phew spah tylli ki drone hynrei ka phah ruh ia ki nonghikai pynher drone, la ong ka thymmei khubor ka India.
Katkum ka khubor, la ong ba ki briew na ri Turkey kila iarap ia ki shipai ka Pakistan ban hiar thma da ki drone ia ka India hadien ba ka India ka la pyntreikam da ka Operation Sindoor na ka jingshah siat iap 26 ngut ki nongleitkai ha Pahagam.
La iathuh ba ka Pakistan ka la pyndonkam da ki drone Bayraktar TB2 bad YIHA pyrshah ia ka India. Kine ki drone ki thew ia ka thong ha ki jaka ba la thmu kiba la pynkit ryngkat ki tiar pynbthei.
Ka jingiadei paralok ka Turkey bad ka Pakistan ka la nang sngaid ha kine ki snem, ha kaba ka la phah ia ki tiar shipai bad ruh ka ai jinghikai ia ki shipai ka Pakistan.
Ha ka miet 7 bad 8 tarik Jymmang, 2025, ki shipai ka Pakistan kila pyndonkam kumba 300–400 tylli ki drone ban ther ia ki ktem shipai ka India kiba don ha bynta ba sha sepngi bad shatei ka India.
Katkum ki stad Forensic ba la khar na ki lyngkhot lyngkhai jong ki drone kiba la shah pynhap khyndew na ka jingsiat ka India, la shem ba kine ki drone ki dei na ri Turkey, kiba ai kyrteng kum ki Turkish Asisguard Songar drones,” la ong ka Colonel Sofiya Qureshi haba kren halor ka jingpyntreikam ka India ia ka Operation Sindoor.
Ki shipai ka India kila pynhap khyndew bun bah kine ki drone da kaba siat kylla ia ki ha ka Operation Sindoor.
Ka la don ruh ka jingsawa jur ka sur ha India ban sangeh noh ne boycott ban thied ia ki tiar ka ri Turkey halor kane ka jingkyrshan jongka ia ka Pakistan.
Paw ba pynpoi drone ka Turkey, iap lang 2 ngut ki nonghikai drone ka Turkey ha ka jingther ka India
