Mairang: Watla ka jingdon kiba dang bat dang ksoh ha ka niam Khasi, kila duna bha ha ka thain Eastern West Khasi Hills District namar ba kila kylla sha kiwei ki jait jingngeit, hynrei ka shad ka Seng Khasi ka la phuh ka la phieng bha.
Mynta ka sngi, ka Seng Khasi Hills jong ka Eastern West Khasi Hills, ka la pynlong ia ka shad Seng Khasi jong ka District ha Mairang, ha kaba la wan tuid ki nongshad kynthei bad shynrang na kylleng ki jaka sha kane ka lympung shad ban pynphuh pynphieng.
Kane ka dei ka sien kaba saw jong kane ka Shad Seng Khasi katei ka district naduh ba la ioh ia la kajong ka district bad ka bor district ka la ai shuti kyrpang ruh ia baroh ki skul, ki ophis ha kane ka sngi kiba don ha ka district.
Haba kren bad u President ka Seng Khasi Pyndengumiong, Eastern West Khasi Hills, u bah Madras Nongrum ula iathuh ba ia kane ka shad la pyllong ka Seng Khasi Pyndengumiong hynrei naduh u snem 2022, ki tnat seng bapher bapher kila rai bad mynjur lang ban pyllong kum ka Shad Seng Khasi jong ka Eastern West Khasi Hills.
Ha ka jingiaid lynti kane ka shad sha ka snem kaba saw, ka la nang phuh nang phieng bha da ka jingwan ai mynsiem ki paraku parakha na kylleng ki jaka.
“La sdang ia kane ka shad suk mynsiem ha u snem 2022 bad kane ka dei ka sien kaba saw, bad kumno ka kiew wat hapdeng ka jingduna kiba don ha ka niam tynrai Khasi, hynrei da ka jingiasnohkti lang ki tnad seng bad ka seng Khasi, ngi la lah ban nang kyntiew katba nang iaid ka snem bad mynta u snem lei, ngi sngew shngain ban iohi ia ka jingwan shim bynta shitrhem ki khun samla”, la ong u bah Madras.
U bah Madras ula kubur ba watla ha Eastern West Khasi Hills, ki la duna kiba don ha ka niam Khasi namar ba kila kylla sha kawei ka jingngeit, hynrei kane kam dei ka jingduh mynsiem namar ba ka Seng Khasi ka la nang rhem katba nang mih ki sngi, ban pynneh ban pynsah bad iada ia ka riti ka dustur u Khasi kumba la suit la shor u longshwa manshwa. U la ong ba ka Seng Khasi Eastern West Khasi Hills, ka la khot ka wer ia kito kiba la leit sha kiwei ki jingngeit ba kin wan phai biang ban kdup ban ksoh ia la ka niam Khasi lajong.
Ha kajuh ka por u la ong ba ka Seng Khasi Eastern West Khasi Hills kam shym la khang ban wan iashim bynta kito kiba la kylla sha kawei ka jingngeit hynrei ki dei ban sngewthuh ba lada ki wan ban iashim bynta kane ka shad, ka Seng Khasi ka pynkynmaw ba shwa ban pyllong ia ka shad ka kmen, ka da iapan iaduwai, bad pyllong ia ka jingknia jingkhriam katkum ka hukum kumba la hikai bad ai pateng ki longshwa manshwa.
“Ka jingpdiang ne ka jingbym pdiang ka don ka lajong ka lynti, ngim ong ba ngim pdiang hynrei ngi sngew ban ong ba ioh lehse ma ngi, kim treh ban pdiang namar ba kane ka shad, ngi pyniaid da ka shad da ka nguh ka dem, ka khnong ka bishar, ka pylleng u khaw, ka um. Ki kur ki kha jong ngi kiba don ha kawei ka jingngeit, ki don ka jingsngew ba lehse ban wan iashim bynta ha ka shad, ba ki la leh niam, kim mon shuh, lada ki kloi ban pdiang ia ka niam Khasi, ka nguh ka dem, ngi kloi ban pdiang”, u la ong.
Wat la duna kiba don ha ka niam Tynrai, shongkun bad phuh ka shad Seng Khasi ka Eastern West Khasi
