Shillong: Ki shipai ka India kila kam ba kila pyniap kumba 100 ngut ki lehnoh kiba pyllong ktem bad ai jaka ka Pakistan, ha ka jingther jongki ha kine ki sngi.
U Director General of Military Operation (DGMO) u Lieutenant General Rajiv Ghai ula pyntip mynta ka sngi 11 tarik Jymmang, 2025 sha ki lad pathai khubor ba nalor ki lehnoh ne terrorist, kumba 40 ngut ki shipai ka Pakistan kila kyllon iap ha ka jingther ka India.
Katba na ka liang ka India, kiba iap ki don 5 ngut ki shipai ha kane ka jingiather ba lai saw sngi.
San ngut ki nongialam ba hakhmat ki kynhun pyntriem kiba kyllon iap ki kynthup ia Yusuf Azhar, Abdul Malik Rauf, bad u Mudasir Ahmed.
Kine ki nongialam ki kynhun pyntriem ki dei kiba donkti ha ki jinghiar thma ia ka India kynthup ban rahbor ia ka eroplein IC-182 bad ka jingpynbthei bom ha Pulwana ha kaba 19 ngut ki shipai kila khlad ha ki snem ba la leit.
Ki jaka ba ka India ka khyrwit lyngba ka Operation Sindoor ia ki ktem lehnoh ka dei ha Sawai Nalla, Sarjal, Muridke, Kotli, Kotli Gulpur, Mehmoona Joya, Bhimber bad Bahawalpur.
Ka jingther ka India ka shim por 25 minit ban pynpra ia kine ki ktem lehnoh ha Pakistan. U DGMO ula ong ba ka India ka la ther ia kine ki ktem lehnoh da kaba jied bad phikir bha ban ym ktah ia ki riew paidbah.
U la ong ba ki shipai ka India ki long kiba la khreh ban iatyngkhuh bad ki shipai ka Pakistan ne kino kino ki jingtynjuh ha kano kano ka por lada ka wan ban pyndik.
Iap 30-40 ki shipai Pakistan, 100 ngut ki lehnoh, iap 5 ngut na India
