Shillong: Ka Khasi Students Union (KSU) South Khasi Hills mynta ka sngi ka la ujor sha u SDO ka Sohra Civil Sub-Division halor ka jingwan rung tuh ki briew na shiliang pud ha ka thain khappud, Majai, Shella bad ki jaka bym pat dep ker sainar.
Haba kren halor kane, u President ka seng u bah Ribokstar Diengdoh ula ong ba ka seng ka la ju ujor ruh ha ki snem ba la leit halor ka jingwan rung tuh ki briew na Bangladesh sha India khamtam na ki jaka bym pat ban ker sainar shiah.
Ula ong ba ka seng ka la ujor ruh halor ka jingkhaii beain ia u piat, ka shini, u rynsun, ki masi bad kiwei ki mar sha Bangladesh na India bad ula kyntu ia u SDO ba dei ban ai da ka challan ban khaii ym ban shu leh tuh namar ba kumba long mynta, ka jingkhaii kaba iaid da ka iaid sha Bangladesh, ka dei tang u mawshun bad u mawthup.
Kawei pat ka mat ba ka seng ka la buh ha u SDO ka long ban pynduh noh ia ka ophis ka Labour Department namar ba kam don eiei wat tang u Labour Inspector bad ka jingkhynra nongbylla ka Labour ka dei tang ha u 2017. U la ong ba ka seng kan khynra nongbylla bar jylla biang ha kine ki sngi ha ka thain Shella, Sohra namar ba kumba long mynta ym ithuh shuh kita ki bar jylla kiba wan naduh u snem 1972 ne ha u snem aiu.
Ujor ka KSU ha u SDO ba rung ki briew na shiliang pud, dawa pyndam noh ia ka Labour Dept
