Shillong: U Symbud myntri rangbah ka jylla u bah Prestone Tynsong ula ong ba wat ma u shimet, u sngew ba ka lynti rel ka long kaba donkam hynrei kam mut ban shu wanrah hynrei ka donkam ia ka jingiasyllok bad ki kynhun bapher bapher.
Dei halor kane ka nongrim, ba ka sorkar ka la thaw ia ka All Party Committee kaba khlieh da u Myntri Rangbah ka jylla u Conrad K Sangma ban iathir bha ia kane ka mat.
Haba kren mynta ka sngi, u bah Prestone u la ong ba ka jingkren u myntri ka tnad rel ka ri u Ashwini Vaishnaw ka dei kaba shisha, ha kaba u la ong ba ka sorkar India ka dang kwah ban wanrah rel sha Meghalaya na ka bynta ka jingbit jingbiang ki paidbah ka jylla.
U bah Presteon u la ong ba ka Committee kan iathir halor ka jingdawa ia ki lad ki lynti ban tehlakam ia ka jingwan rung ki briew namar ba ka sorkar ruh ka kwah ia ka Inner Line Permit (ILP).
“Dang shen, la thaw ia ka All Party Committee, ha kaba yn iakren bniah halor bad yn sa shim ia ka rai. Ma nga shimet, nga sngew ba ka donkam ia ka lynti rel hynrei ka donkam ban iasyllok bad ki paidbah, ki kynhun ban shim ia ka rai lang shrup bad dei halor kane, ka sorkar ka thaw ia ka Committee ban iathir bha”, la ong bah Prestone.
U la ong ba ka Committee kan iathir halor ka jingdawa ia ki lad ki lynti ban tehlakam ia ka jingwan rung ki briew namar ba ka sorkar ruh ka kwah ia ka ILP.
Ka donkam ka lynti rel tangba hap ban iasyllok bad ki kynhun bapher bapher, ong u bah Prestone
