Shillong: U Pastor WK Syiemlieh ula sneng ula khraw ia ki khynnah skul ka Nongspung Presbyterian Secondary School ba ki dei ban don ka thong ha ka jingim bad ban long kiba kohnguh bad tip sngi. Kumjuh ki kmie ki kpa jong ki khun ha nongkyndong ki dei ban peit ba ki khun kin pule kin khreh kot bha, ym ban pyllait laitlan kum ki blang tlang.
Ki kmie ki kpa ki dei ban don ka jingiajan kaba khlain bha bad ki khun namar lada ki khun kim kohnguh ia ki kmie ki kpa, ka jingim jongki kam poi shaei shaei ruh.
U la ong ba ha sor ki kmie ki kpa ki da shimkhia ban peit ban khmih ia ki khun haba ki wan na skul, bad ki long kum ki babu ïing hynrei ha nongkyndong bunsien kim leh kumta.
Ka Nongspung Presbyterian Secondary School ha ka 2 tarik Jymmang 2025, ka la pynkup burom ia u samla Rikyrpang Marbaniang uba la wan ha ka kyrdan Top 20 ha ka result matrik dang shen lem bad 10 ngut kiwei pat kiba pass lang na kane ka skul.
U Pastor WK Syiemlieh u la ong ba ka jinglait ia ka matrik ka dang dei shi mawjam ha ka jingim jong u ne ka khynnah bad ki dei ban trei shitom shuh ban jam shuh shakhmat haduh ban long briew namar kampher lada ioh ne ym ioh kam sorkar, hynrei kaba donkam ka dei ban ioh ia ka jingstad namar ba shisien ba la ioh ia ka jingstad, lada long nongrep ne lada shong dukan ruh ka pher na ki bym don ka jingstad.
‘Ha sor don ki babu ïing, ha nongkyndong pyllait kum u blang tlang’, sneng u Pastor WK Syiemlieh ia ki khynnah
