Shillong: Ka jingpyrkhing ki shipai BSF ia ka jingkhaii beain bad khaii tuh ia ki mar ki mata na India ka la kham kynjah ha kine ki sngi na khappud ka India kiba hap ha Meghalaya. Hynrei mynta ka la don pat ka jingjur ki briew na Bangladesh ban rung tuh sha India.
Dang hynnin ka sngi, ka 3 tarik Jymmang 2025, ki BSF kila ioh kem 5 ngut ki briew na Bangladesh kiba la thmu ban rung tuh sha India na ki khappud kiba hap ha East Khasi Hills, ka Meghalaya. Kine ki ar ngut ki briew na Bangladesh kiba rung sha India, kila phla ha ki BSF ba ki wan sha India ban wad kam wad jam. Ia kine la kem da ki BSF jong ka 193rd Battalion bad la aiti noh sha ki pulit ka Dangar.
Ha kawei ka jingjia, ki BSF 50th Battalion kila ioh kem 3 ngut ki Bangladeshi kiba trei suhjain ha Ahmedabad, Gujarat kiba dei na Pabna, Sherpur bad Kishoreganj District ka Bangladesh. Ia kine la aiti sha ki pulit ka Mahendraganj Police Station ha West Garo Hills.
Ha kawei ka jingjia pat, ki BSF kila kem ar ngut ki briew na India bad ar tylli ka kali kiba kit ia ki mar ban shalan tuh sha Bangladesh na khappud ha East Khasi Hills. Kine ki mar kiba thmu ban shalan tuh sha Bangladesh ka shong dor kumba T.3 lak tyngka. La aiti ia kine ki briew sha ki pulit Police Post ha Danger.
Shuh shuh ki BSF kila ioh kurup 12 tylli ki masi hajan khappud bad 2 tylli ki kali ba la ieh noh ki runar ban lait na ka jingshah kem ha ki BSF.
Kynjah ka jingtuid ki mar beain na India ha khappud, thnem pat ka jingrung tuh ki briew na Bangladesh
