Shillong: Ki doktor ka NEIGRIHMS hapoh ka lama ka NEIGRIHMS Faculty Association (NFA) kila pynpaw ia ka jingsngew khia jur halor ka jingiakhih kaba long hapoh ka phyllaw ka hospital kaba la mih ha kine ki khyndiat bnai ba la dep.
Ha ka kyrwoh sha ki lad pathai khubor mynta ka 2 tarik Jymmang 2025,, ki doktor kila ong ba watla ka don ka hok ban pyllong ia ka jingpynpaw da ka lynti kaba jai jai bad ka jingiakren ha ka synshar paidbah, hynrei ka jaka bad ka rukom pyllong ia ka jingiakhih ka la wanrah ka jingsngew khia jur.
Ka hospital ka dei ka jaka ha kaba ki briew ki wan ban ioh ia ka jingsumar ban koit ban khiah, bad ioh ka jingsngew shngain. Kano kano ka kam kaba ktah ia ka jingsumar, ka pynwit ia ka jingpule lane kaba wanrah ia ka jingthut ha ka shongsuk shongsain kan dei kaba sngew khia jur. Na ka liang ki doktor kila pynpaw ia ka jingsngewkhia ia ka jingpyllong iaka jingiakhih khamtam kaba lah ban pynwit pynthut ia ka jingtreikam treikam, bad kan pyrkhing ia ka iaid ka ieng jong ki nongtrei, kaba lah ban ktah ia ka thong bad ka kamram ban ai ka jingshakri ia ki paidbah bad ka wanrah ia ka jinglong jingman ka bym shngain. Kan ktah ia ka jingsumar ia kiba pang, ia ka jingai jinghikai ruh. Ka jingdon ka jingiakhih hapoh ka phyllaw ka hospital kan ktah ym tang ia ki nonghikai hynrei ia ki samla pule, ki nongpang, ki nurse.
Ka NEIGRIHMS ieng ban ai ka jingshakri kaba bha tam ia ki nongpang, ha ka jinghikai, bad ha ka jingwad bniah bad ka ngeit ba ka jingiakhih pyrshah kam dei ban long hapoh ka phyllaw ka hospital, namar ba ka ktah ia ka jingbit jingbiang nalor ba ka la don lypa ka jingduna ki nonghikai bad ka jingiakhih kan nang pynthut ia ka jingthmu kito kiba la thmu ban wan trei ha NEIGRIHMS. Ki la kyntu ia kiba pyllong ia ka jingiakhih ba kin iakren ban pynbeit ia ki jingeh da ka lynti kaba dei na ka bynta ka jingbit jingbiang ka hospital bad ki paidbah.
Lah ban kdew ba ka KSU ka la pyllong ia ka jingiakhih ha phyllaw ka Administrative Block ka NEIGRIHMS ban daw ana ka bor pyniaid ban ai bhah kam bun ia ki trai shnong khamtam ki kam Nurse ha kane ka jaka sumar. Shwa ia kane, ka seng HYC ruh ka la leit khang tala ia kane ka Administrative Block hadien ba ka bor pyniaid kam shym la ai jubab ha ka por ba ka seng ka la buh halor ka jingdawa ban mang bhah kam khambun ia ki trai shnong ka jylla.
Ka jingiakhih hapoh phyllaw ka NEIGRIHMS ki ktah ia ka kam ka jam bad ka jingsumar, ong ki doktor
