Shillong: Ka chairperson ka Meghalaya State Commission for Women ryngkat ki dkhot, ki la leit peit ia ka longkmie kaba shoh shah dat ha u lok jongka, kaba shah sumar ha Shillong Civil Hospital.
Ka Chairperson ka kong Iamonlang Syiem ka la iathuh ba une u lok uba la kham iaw rta uba la tip kyrteng kum u Petros ula ju shoh bunsien ia kane ka kurim jongu, kaba dang 26 snem.
Haba kren sha ki lad pathai khubor ka kong Iamonlang ka la ong ba katkum ka jingtip, kila iashong la ar snem eiei bad la kynnoh ba une u kurim ula shoh man ka por bad la saw sien ka la hap sha um. Ka la ong ba kane ka longkmie ka la don lypa iwei I khunruit ba 5 snem bad ha ka jingjia myn shi sngi, haba u shoh u tied, ine I khunruit ila leit pyntip sha I mei ieid jongi ba sah jan.
Ka kong Iamonlang ka la pynpaw ia ka jingsngewsih ia kane ka jingjia man ka por bad ka la kyrpad ia ki rangbah ba kin ym leh bein ia ki longkmie. Ka la kyrpad ba lada don kano kano ka jingshah leh bein ki kynthei, ki briew ki dei ban iarap lem ia ki namar ba kam dei shuh ka kam iing kam seng hynrei ka dei ka jingeh jong ka imlang sahlang.
Ka la ong ba la ujor ejahar halor kane ka jingjia bad ka Commission kan buddien ia kane. La ioh jingtip ba ki pulit kila kem bad la tian bishar ha ka Kashari.
Pyntip I khunruit ba 5 snem ha I mei ieid ha por shoh u lok ia la ka kurim
