Shillong: Ka surokbah bah Shillong-Dawki NH-40 kaba dang iaid mynta ha ka jingshna kan long kawei kaban khring bha ia ki paidbah nongwankai ynda la dep.
Ki bynta jong kane ka surok naduh sharum ka Laitlyngkot haduh Wahlyngkhat ban poi ha Pynursla ki don ki jaka kiba itynnad ban peitkai lynter ka surok sha them namar ka jingdon ki lum ki wah, bad ki riat ki ram kiba shyrkhei ryngkat ki khlaw ki btap ba pynphong ka mariang.
Kumba ju bna, ka bynta ha Rngain ka dei kaba ju syier bha ki briew ban shong kali namar ba ka surok ka long kaba khim bad ka riat kaba jylliew da ki spah metre shapoh bad tang shu bakla tiak, kan long ka jingma kaba pynsuhjer.
Hynrei mynta ka la kylla bak ly bak namar ba la pynheh ia ka surok da ka two lane ne ka surok kaban ngiam ban iaid haduh 2 tylli ki kali. Ka thain Rngain ka dei kawei kaba ju kynduh jingeh bha ha ka leit ka wan ha ka por mynshwa namar ba tang shu slap, ka ju don ka jinghap ki maw bad ka twa.
Uwei na ki nongshong shnong ka thain riwar u bah SB Tariang haba iakren u la iathuh ba mynshwa katei ka surok ha ka thain Rngain ka long kaba khim bad kaba riat bha mynshwa bad ki briew ki ju syier ban shong kali khamtam kito kiba wan na kiwei ki jaka hynrei mynta kane ka surok ka la heh bad kam don shuh ka jingsngew syier. U la ong ba katei ka jaka ka long kaba itynnad ban peit kai sha baroh ar liang ka surok ia ki lum ki them shapoh.
Hynrei ha kajuh ka por, ha ka por ba lyiur katei ka thain ka jur bha ruh ka jingtap lyoh haduh ba shitom ban peit na ka jingrben u lyoh. Kumta, ki nongniah kali ki dei ban niah phikir bha la ka dei ha ka por lyiur ne ka por rang ruh.
Ka Rngain ka surok kaba syier tam, kan khring ka jingitynnad ynda la dep ia ka two Lane
