Shillong: Ka Federation of Khasi Jaiñtia and Garo People (FKJGP) Central Body, ka dap da ka jing sngewkhia kaba khraw bad ka pynrem jur halor ka jingkem ia u Samla Sandy Sohtun, President North Eastern Hills University Students Union (NEHUSU). Kum ka seng kala sakhi ia ki kynrum kynram kaba la mih ha ka skulbah NEHU hadien ba ka kynhun jong samla pule jong ka skulbah NEHU hapoh ka jingialam jong u Samla Sandy Sohtun ban sei madan iaki kam bamsap bad ki jing bym iaid beit iaid ryntih haduh ba la poi u pud ba ki samla pule jong ka Skulbah NEHU kin pynlong iaka jingshah thngan kaba khlem buhpor ban dawa ban wengkam mardor ia u Vice Chancellor. Ka jing shim sting jong ka sorkar jylla ban tuklar ia katei ka kam haduh mynta mynne ka dang pyndkhoh ia kiba bun ki rukom treikam ha ka skulbah NEHU.
Ka FKJGP ka sngew ba ka jingshah pharep jong u samla Sandy Sohtun, President North Eastern Hills University Students Union (NEHUSU) lyngba jong uwei u Nonghikai jong katei ka skulbah ka lah ban don kaei re kaei kaba sha lyndet ban set da u kak na ka shyntur jong ki samla pule ban dawa iala ka jong ka hok ban saiñdur ruh na ka bynta ka jingiaid shaphrang jong katei ka skulbah. Ka jingrung jubor jong ki bor pulit hapoh ka campus jong ka skulbah NEHU ha ka jaka ba kan long ka jing shngaiñ kan long pynban kum ka jing pyntieng pynsmiej ia ki samla pule jong katei ka skulbah. Ka sorkar ka dei ban shimkhia mardor ia katei ka kam ba teh lakam bad ban thung da ka kynhun tohkit ka bym noh shiliang khmat khnang ba ki jingshisha kin paw pyrthei.
Kum ka seng na ka por sha ka por kala ju ioh ia shibun ki jingujor halor ka jing shah niewbeiñ bad shah leh shiliang khmat ym tang ia ki samla pule hynrei wat ia ki nongtrei ha katei ka skulbah kiba la wan jia ha ki dur bula ki bapher bapher lyngba ka jingngeit niam bapher bapher bad kumta ter ter, kumta na ka liang jong ka FKJGP ka maham jur ia ki bor kiba nabar ba kim dei satia ban pyrshang ban ialam bakla bad ban balia siangsdieh da kaba pyrshang ban tap eitmiaw ia ki kam ba uta u Vice Chancellor u la leh ban pynjah burom ia ka NEHU ha kaba ki samla pule bad wat ki nongtrei kiba don don ka ka Skulbah NEHU kim mon shuh ia u ban dang long kum uta u khliehduh ban pyniaid ia kiei kiei baroh.
Kyntang iawai ka FKJGP ka kren da kaba shai ba kan sa tih tyllong ia kiei kiei baroh bad kan ym shong kli kti satia halor ki jinglong jingman jong ka skulbah NEHU bad kum ka seng kan ym ailad ba ki samla trai ri kin shu kylla long ki langkñia tang na ka bynta ka jing myntoi jong ki briew kiba nabar kiba don bynta ha ka saiñpyrthei jong ka ri India ba iar. Kane ka long ka kyrwoh kaba la pyllait u bah Kitboklang Nongphlang, Vice-President ka FKJGP, Central Body.
Pynrem ka FKJGP ba shah kem u president ka NEHUSU samla Sandy
