Shillong: U myntri ka Hima Mylliem ba peit ia ka iew, u myntri War Tynghah u la ong ba na ka liang ka Hima Mylliem kam don eiei ka jingtip halor ka jingkhang iew hynrei ka dei ka jingkhang hi jong ki briew.
Ula ong ba katkum ka jingkylli jong u na ki nongshong dukan, kila iathuh ba ki khang namar ba ka jingjia ha Pahalgam, Jammu & Kashmir dang shen.
Ula pynshai ba ka Dorbar Hima Mylliem bad u Syiem kim shym la khang satia ia ka iew bad kim don jingtip ban don ka jingkhang ia ka iew bad ym tip ruh ia kiba khang dukan.
U myntri ula ong ba lada dei ba khang iew ka Hima, u Syiem bad ka Hima ka la pyntip ha ki lad pathai khubor Khasi khnang ba ki paidbah kin tip.
Ha kajuh ka por, u la ong ba ka jingkhang iew ka la wanrah ka jingduh nong ia ki paidbah bad kumjuh ia ka Hima.
Mynta ki dukan ha Iewduh kila khang lut lait noh tang katto katne kiba plie. Katkum ka jingtip, ki dukan kila khang na ka jingkyrpad ka Shillong Citizen Forum kum shi bynta ban pynrem ia ka jingjia ha Pahalgam ha Jammu & Kashmir dang shen. Kane ka jingkhang dukan kam dei ba pynbor hynrei kaba la leh da ka mon sngewbha jong ki nongshong dukan bad ki trai.
Ka Hima Mylliem kam don jingtip ba khang ki dukan ha Iewduh, ong u myntri
