Shillong: Ki samla pule ka NEHU mynta ka janmiet kila bitar jur ia ka jingphah pulit bad CRP ka sorkar ban pahara ha NEHU bad ki bym treh ban mih wat hadien ba kila pynsngew ha ki majistor kiba don ha katei ka jaka.
Hadien ba la iapyni nia bad iathalain bad ki majistor ba ki dei ban phah mih ia ki pulit bad CRP, kam shym la urlong, kila rai ba naduh lashai ka sngi kin ym leit shong klas katba dang pahara ki pulit bad CRP ha NEHU.
U General Secretary ka NEHUSU u samla Toniho S Kharsati ula pynbna ia kane ha phyllaw ka NEHU hakhmat ba don lang ki samla pule ka NEHU hajan ki majistor.
Ula ong ba lada ka sorkar ka kwah ban peit ia ka jingbha ki pulit kan bha ban phah pahara phah shong ia ki CRP, ki pulit hynrei lada ka kwah ia ka jingbha ki samla pule, ka dei ban phah mih noh mardor ia ki pulit, ki CRP na NEHU.
Ula ong ba lada ka sorkar kam phah mih ia ki pulit, CRP, ai ba kin shong klas noh ma ki bad ki samla pule kin ap shabar ka khyrdop.
Shwa ia kane, ka la mih ka jingiania tain hapdeng ki samla pule ka skulbah NEHU bad ki majistor hadien ba ki spah ngut ki pulit kila leit rung sha NEHU.
Ki samla pule kynthei bad shynrang kiba iohi ia ki pulit kiba wan rung sha NEHU naduh ka por 4 baje eiei janmiet, kila mih puk ban pyrshah. Ka la don ka jingpyni nia na ki samla pule ka skulbah NEHU bad ki majistor.
Katkum ka jingtip wat ka Acting Vice Chancellor ruh kam shym la ai jingbit ia ki pulit ban rung sha NEHU.
Watla ym pat ioh jingtip ia ka daw ba ki pulit ki leit rung sha NEHU hynrei la suba ba ki lah ban leit thwet ia ki samla kiba la shah kynnoh lang bad u President ka NEHUSU u samla Sandy Sohtun uba la shah kem halor ka jingkynnoh ban donkti ban shoh ia u Assistant Professor u Dr. Alok Singh uba hikai Hindi ha NEHU.
Ki samla pule ka NEHU kiba la ialum pyrshah ia ka jingwan rung ki pulit ha phyllaw ka NEHU, kila kyrpad ia ki majistor ba kin phah mih noh ia ki pulit khnang ba kin iapra noh namar ba ki hap leit pule kot noh sha ing.
Kila kyrpad ia ki majistor ba kin sngewthuh ia ka jingeh jong ki samla pule namar ba ki don test ruh bad kan ktah ia ki lada ki pynap sah nalor ba la miet.
Ki samla pule kila ialum ha phyllaw ka NEHU hadien ba ki pulit kila wan rung shi sbung mynta ka janmiet 28 tarik Iaiong 2025.
Ym pat lah ban tip tangba ka jingwan rung ki pulit ka lah ban dei ba ki thmu ban tohkit halor ka jingjia shah shoh uwei u nonghikai Hindi ka NEHU u Dr. Alok Singh dang shen, ha kaba u nongialam ka NEHUSU u samla Sandy Sohtun ula shah kem.
Ki samla pule ka NEHU kila khie bitar jur ia ka jingwan rung ki pulit sha phyllaw ka NEHU bad kila ong ba lada donkam ban pahara na ka liang ki samla pule ki kloi ban ap lang na ka bynta ka jingshngain ka NEHU.
Kila ong ba kim donkam ban wan ap ki pulit ha NEHU namar kum ki samla pule kim dei ki nongthaw jingkulmar hynrei kiba la nang la stad.
Hadien ba ki majistor kim shym la ai satia ia ka jubab ban phah mih noh ia ki pulit, ki CRP, na ka liang ki samla pule kila rai ban phet noh na NEHU bad naduh lashai kin ym shong klas katba dang don ki pulit, ki CRP.
Kila pynrem jur ia ka jingleh ka sorkar, kaba la pyllong ktem thma pynban ia ka skulbah kaba dei ka shlem jong ka jingnang jingstad.
Bym mih ki pulit, ki CRP na NEHU, rai ki samla pule ka NEHU ban ym shong klas naduh lashai
