Shillong: U symbud myntri rangbah ka jylla uba peit ia ka tnad ka kit ka bah ka leit ka wan, u bah Sniawbhalang Dhar ula pyntip mynta ka sngi, ba ka Airports Authority of India (AAI) ka la khot tender ban shna pynjrong ia ka lynti mareh khnang ba ki liengsuin heh kin lah ban dem ha Umroi.
Katkum ka jingong u symbud myntri rangbah, ka sorkar jylla ka la buh thong ban pyntreikam ia kane ka kam ha kaba kut u snem 2026 ha kaba ki liengsuin heh kiban kit briew kin lah ban wan dem bad her beit sak sha ki nongbah ba heh ka ri India bad shabar ri khlem da donkam shuh ban leit shong liengsuin na Guwahati.
U la ong ba ka jaka kaba donkam ban pynjrong bad pynheh ia ka lynti mareh ki liengsuin ka kaba hap ha ka Runway End Safety Area (RESA).
Ka jingpynheh ka donkam sa 571 metre na kaba don mynta kaba 2,400 metre.
Ka AAI ka la aiti ia ka draft ka master plan ban pynheh ia kane ka kad liengsuin ha u snem 2024, bad ka jingshim jaka kaba 22 akar la pyndep na ka bynta kane ka jingthmu.
Hadien ba la dep shna ia kane, ki liengsuin heh kin wan ban kit bad buh briew sha bad na ki nongbah ba heh ka ri bad nabar ri bad kan kyntiew ia ka kam jngohkai, ka khaii pateng bad kan wanrah ka jingiajan ha ka ri bad ka thain.
La khot tender ka AAI ban pynjrong ia ka lynti mareh ki liengsuin heh ha Umroi
