Shillong: Mynta ka sngi, ka Joint Action Committee ki khun ki hajar ka Hima Sohiong, kila ujor sha u CEM ka KHADC pyrshah ïa ka jingai jaka jong ka Shnat Hima Nongwah Mawtamur, Hima Sohiong sha ki 65 tylli ki kynhun na ka jylla Assam ha ka 22 tarik Lber,, 2025.
U Bah Purningstar Shabong u Chairman bad u bah Bah Marchkupar Thabah, Secretary ka JAC ki la ong ba ka JAC ka la ong ba katkum ka jingïoh jingtip, ka tei ka jaka kaba ka shnat Hima Nongwah Mawtamur ka la ai sha ki 65 tylli ki kynhun na ka jylla Assam ka dei kaba don ha Laitlum, Nongwah.
Ka jingai jaka sha ki briew na ka jylla Assam ka long kaei kaei kaba ym lah ban pdiang bad kane ka dei ka kam be-riti kaba khlem poi pyrkhat ba ka shnat Hima Nongwah Mawtamur kan leh ïa kane ka kam.
Halor kaner, ka kyrpad ia u CEM ka KHADC bah Shemborlang Rynjah ban shim khia halor kane ban pan jingpynshai na ka shnat Hima Nongwah Mawtamur, Hima Sohiong bad ban pyndam mardor ïa ka tei ka jingai jaka sha ki tei ki briew Assam.
Ha ka juh ka por, ka kyrpad ban pynshitom ïa ki briew kiba don bynta ha kane ka kam kaba la ktah matïong ïa ka Hima bad ïa ka jylla hi baroh kawei.
Ha kajuh ka por, ka JAC ka la kyntu ia ka KHADC ban pynbeit thymmai ne Amend ïa ka Khasi Hills Autonomous District (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship) Act, 2023.
Ka JAC ka sngew bynñiaw bad sngewsih halor ka Khasi Hills Autonomous District (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship) Act, 2023 la shu thaw sop sop bad la shu thaw donbor da u Acting Lyngdoh bad ka Executive Dorbar jong ka Hima Sohiong.
Ka la kynnoh ba ka Bill jong ka Act kaba la pass ha ïng Dorbar jong ka KHADC, ka bym iahap satia. Ka JAC ka la ai da ka jingthoh sha u Deputy CEM bad sha u CEM mynshwa, ban pynphai biang shwa ïa ka Bill sha ka Hima Sohiong namar ba la pass ha KHADC khlem don kano kano ka jinglum Dorbar ne ka jing ïa phylliew jingmut hapoh ka Hima Sohiong, hynrei la shu leh donbor ban phah ban phah sha u Governor ban ai ka jingmynjur.
U Bah Purning u la ong ba ka Act jong ka Hima Sohiong kaba la thaw ha ka rukom ka bym ïahap satia bad kiba long pyrshah ïa ka rukom shynshar khadar ha poh ka Hima Sohiong.
Ujor ka JAC ha u CEM ba ai jaka sha ki briew ka Assam, dawa pynkylla ia ka Sohiong Act
