Shillong: Ka sorkar jylla mynta ka sngi lyngba ka tnad pule puthi ka la lum ia ki DSEO na ka bynta ban kyntiew kyrdan ia ki Secondary School jong ki kynhun bym dei sorkar khnang ban lah ban pdiang ia kito kiba pass ia ka Matrik ne klas X dang shen.
U Deputy Secretary ka tnad pule puthi ka jylla u bah Banteilang J Kharshandi ula ong ba ka sorkar ka don tang 4 tylli ki Secondary School ki bym pat kyntiew kyrdan sha ka Higher Secondary hynrei kine kim pat lah ban pdiang klas ia kiba pass klas X bad ka donkam ia ki skul bym dei sorkar ruh ba kin kyntiew kyrdan.
U la ong ba ka jingialang ka la iathir ha kaba la bthah ia ki DSEO ban ai ia ki admission form na ka bynta ki jait jingpule ne stream bapher bapher sha baroh ki skul, kiba kwah ban kyntiew kyrdan.
Hadien ba la ioh ia ka jingkhein ia ka jingdon ki khynnah kiba kwah ban jied ia ka lain ban pule, ki DSEO kin sa phah sha ka tnad pule puthi khnang ban tip la ka donkam ne em ban kyntiew kyrdan ia kano kano ka skul.
Kumjuh u la ong ba ka sorkar kan sa eksamin ban thung nonghikai hadien ba la ioh ia ka jingkhein ia ka jingdon ki khynnah kiba kwah ban pule ia kano kano ka lain jingpule.
U bah Banteilang ula ong ba ka tnad pule puthi kan sa phah pat sha ka sorkar ba kan shong jingialang ban shim ia ka rai.
U la ong ba la iakren ruh ban plie ia ka Morning Section khnang ban pynlah ban pdiang ia ki khynnah kiba pass ia ka matrik ha ki klas XI bad halor kane, ki DSEO kin sa phah ia ka jinglum jingkhein sha ka sorkar.
Katkum ka jingong u bah Banteilang ula ong ka jingsdang ban hikai ne ban plie klas kan long ha ka 1 tarik Jylliew.
Phah kyntiew kyrdan ka sorkar sha Higher Secondary bad ka Morning Section ban pdiang ia kiba pass klas X
