PIB, Shillong: La pynbna ia ki nongiashim bynta ba la poi sha ka phainal jong ka Animation Film Makers Competition (AFC) kaba long kum shi bynta jong ka ‘Create in India Challenge Season-1’ jong ka WAVES 2025.
U Bah Khambor Batei Kharjana na Meghalaya ula shah jied kum uwei na ki 42 ngut kiba la poi sha ka phainal ha ka Animation Film Makers Competition (AFC) jong ka WAVES 2025, na ka bynta ka projek jong u kaba la tip kum ka Lapalang: A Khasi Folklore Reimagined, shi bynta jong ka ‘Create in India Challenge Season-1’.
Haba ïasam ïa ka jingsngewkmen jong u, u Bah Kharjana u la ong, “Nga ainguh ïa U Jisu Khrist na ka bynta ka WAVES, ka la long ka jingjia kaba sngewtynnad bha! Ki jinghikai na ki riew shemphang jong ka ri bad nabar ri ki long shisha kiba kordor. Kane kalong kum ka sienjam kaba khraw shakhmat na ka bynta ka kam shna animation ha India. Ka jingkhang ka la plie lypa — mynta ka shong ha ngi ban shim ia ka sienjam bad peit shano ka ialam!”
Ki 42 tylli ki projek kiba bha tam, kiba pynleit jingmut ha ka jingïathuhkhana tynrai ha kylleng ki bynta jong ka kam animation, kaba kynthup ïa ka jingpynwandur tynrai, ka VFX, Augmented Reality (AR)/Virtual Reality (VR), bad virtual production, ki la poi sha ka wat iakhun ba khatduh. Kine ki nongiashim bynta kiba don sap mynta kin ioh ia ka lad ban pyni ia ki projek jong ki ha ka WAVE Summit ka ban long ha Mumbai naduh ka 1-4 tarik Jymmang, 2025. Ki 3 ngut kiba jop kin ioh kia a khusnam pisa kaba mar 5 lak tyngka
Ka jingjied ïa ki 42 ngut ki nongïashim bynta kiba la poi sha ka phainal ka dei na ka jingbishar bniah kaba la neh haduh khyndai bnai ba la ïalam da ka kynhun Dancing Atoms, ha ka jingïatreilang bad ka kynhun jong ka WAVES. Ia ki jingpyrshang ba aiti lut jong ki nongiashim bynta la ioh jingiarap na ka jingstad jong ka kynhun ba donburom jong ki dkhot nongbishar napoh ka ri bad na kiwei kiwei ki ri, kynthup:
Anu Singh
Farrukh Dhondy
Dan Sarto
James Knight
Jan Nagel
Gianmarco Serra
Indu Ramchandani
Vaibhav Piwlatkar
Ka jingktah ia ka ioh ka kot na ki projek jong ki ka long kaba kongsan, ha kaba kawei pa kawei ka phlim VFX animation ka lah ban pynmih ki lad ioh kam na ka bynta 100-300 ngut ki briew. Ka WAVES AFC 2025 ka pyni ia ka jingbei tyngka kaba kongsan ha ki sap saindur jong ka ri India, kaba kyntiew ia ka lad ioh kam bad ki lad ki lynti ba don kylleng ka pyrthei. Ka jingthmu jong ka jingiakop ka long ruh ban kyntiew ia ki jingiatreilang hapdeng ki ri bapher bapher ban pynmih ia ki prokram.
Kane ka sienjam ha kylleng ka pyrthei, kaba la kyrshan da ka tnad Information & Broadcasting bad kaba lamkhmat da ka Dancing Atoms, ka dei ka sien kaba nyngkong ba baroh saw tylli ki bynta jong ka kam AVGC ba la mihkhmat hapoh kawei ka rynsan ha kum kane ka jingïakop.
Ka WAVES AFC 2025 ka la ïoh ïa ka jingiashim bynta kaba khraw, da kaba ïoh kumba 1900 tylli ki jingpynrung kyrteng bad 419 tylli ki jingkyntiew kyrteng bapher bapher na ki briew ba sngewtynnad ia kane ka kam, ki samla pule kiba don sap, bad ki riew shemphang kiba la tbit ha kylleng ka pyrthei. Kane ka jingïashim bynta shitrhem ka pynpaw ïa ka bynta ba kongsan jong ka jingïakop ha kaba ithuh bad kyntiew ïa ki sur ba thymmai hapoh ka kam shna animation.
Shah jied u Khambor Batei Kharjana na Meghalaya sha ka phainal ha ka WAVES 2025 Animation Challenge
