Shillong: Ka lympung ka Seng Khihlang kaba 35 ha shnong Laitryngew, ka la kut noh mynta ka sngi hadien lai sngi kynthih.
Ka phang pdeng jong kane ka lympung ka long, “Ri la Tynrai Ba Longshwa la Tang Janai”, ha kaba ka kong Bakhiamon Rynjah, ka nonghikai College ka shim ia ka bynta ba kongsan ban ai jingkren ha ka noh phai sngi.
Da ki phew hajar ngut ki paidbah kiba dang don ha ka niam tynrai na kylleng ka ri Khasi-Jaintia kila tuid sha kane ka lympung kaba long shi bynta ban kyrsiew ia ka jingngeit niam tynrai bad ban iada ban pynneh pynsah ia ki riti dustur u khun Khasi Khara kumba la seng ki longshwa manshwa.
Ka kong Bakhiamon ka la iasam ia ka thymmei halor ka phang, ka Tip Briew ka Tip Blei bad ka la isaam ia ka niam bad ka hok kaba u Khasi longshwa ula pynieng ia ka nongrim ban ri ban sumar ki blei ryngkew bad ka la ai nuksa ia ka jingjia ha kaba ka Law Kyntang Mawphlang ka la ai jingsneng ia ki shipai kiba leit bam khana ha Law Kyntang Mawphlang da kaba lum ia ki diengthang na katei ka Law Kyntang hynrei ynda kila kiew ha ka kali, kim lah ban pynim ne start ia ka enjin ka kali bad dei tad ynda la wan ki trai shnong kiba la kren ia ki, ba lada kim lah ban leit buh biang ia ka dieng sha law kyntang, kin hap ban sah miet da ki taiew ruh ha katei ka jaka.
Ka la ong ba ka khubor ka Seng Khihlang ka long ban wanrah ia ka jingiaieid ka jingiatylli hapdeng jong ki Khynriam, Pnar, Bhoi, War, Lynngam naruh rilang shaduh Kupli naduh Brahma shaduh Surma. Ka la ong ba naduh West Khasi Hills, na thain riwar kaba mut ka Surma, shaduh Karbi Anglong kaba hap ha Brahma, na Jaintia Hills kiba hap ha Kupli kila iapoi lang ban pynkhie im ia ka tynrai, ym tang ha ka shad ka kmen hynrei ban sngewthuh khambha ha ka jingiadei bad ka tip briew tip blei bad ka jingiadei para briew bad ka jingiadei bad u Nongthaw.
Ha kane ka sngi, ka la don ruh ka jingpyni lariti na ki tnad Seng Khasi bad Sein Raij bapher bapher ia la ki rukom shad ki rukom rwai katkum ka jinglong ki it ki hima bad ki raid ki shnong jongki na kylleng ki jaka.
Tuid ki paidbah sha ka lympung bah ka Seng Khihlang ba 35 ha Laitryngew
