Shillong: U nonghikai rangbah ka KJP Girls Higher Secondary School, Shillong u Babu Kular Khongjirem u la ong ba ka jingwanrah ka sorkar ban hikai ia ka ktien Garo ia ki Khasi bad ka ktien Khasi ia ki Garo kam dei kaba sniew hynrei kan don pat ka jingeh lada ka pyllong compulsory ia kine ki ktien.
Haba kren mynta ka sngi, u Babu Kular u la ong ba ka sorkar ka donkam ban thung nonghikai la kumno kumno 2 ngut ki nonghikai ha kawei ka skul kaba kham heh ban hikai ktien Garo ha ki skul kiba hap Khasi-Jaintia bad ar ngut ki Khasi ban hikai sha ki skul sha Garo Hills.
U Babu Kular ula ong ba ka sorkar kane ka dei ka jingeh namar ba ka sorkar kan hap thung nonghikai da ki hajar ngut namar ba wat ia ki kam nonghikai kiba la don mynta kam lah ban siew tulop thikna.
Katkum ka jingong u Babu Kular kaba kongsan ka long ban tip ia ka nongrim ka ktien bad ka jingthmu ka sorkar kam dei kaba sniew bad ka long ruh ban wanrah ia ka jingsngew ialong kawei hapdeng kine ki jaitbynriew bad kawei pat ka dei ka jingpynkhlain ia ka jingdawa ban pynrung ia ka ktien Khasi bad Garo ha ka khyrnit ba phra ka riti synshar ka ri India.
Shuh shuh u la ong ba ka sorkar ka dei ban wad ia ki nongthoh kot kiba nang ban thoh ban hikai ia ka ktien Garo bad ktien Khasi, lym kumta kan long kaba eh ban shu hikai kumba long ha iew ha hat.