Shillong: U President ka seng ki skul SSA ha ka jylla, ka MSSASA u bah Aristotle Rymbai ula pynpaw ba ka jingthmu ka sorkar ban pynrung ia ka ktien Khasi ban pule ki Garo bad ka ktien Garo ban pule ki khynnah Khasi haduh klas IV, ka long kaba iahap ban wanrah ia ka jingsngew iajan.
Hynrei ha kajuh ka por, u la ong ba ka sorkar ka hap ban pyrkhat ba kan ym mih kano kano ka jingeh namar ba ioh bakla ka nongrim, kan ktah pat ia ki khynnah.
Haba kren mynta ka sngi halor kane, u bah Aristotle u la ong ba kan kham biang ba ka sorkar kan pynrung ia ka ktien phareng naduh ba sdang khnang ban suk ki khynnah ynda la kiew sha ki klas ba shaneng. U la ong ba ha ki Primary skul ka sorkar, ki hikai beit ia ka ktien Khasi ia baroh ki sobjek bad ynda kila kiew sha Upper Primary ki shem jingeh namar ba ki hikai da ka phareng.
U bah Aristotle u la ong ba haba ka sorkar ka wanrah ia kane ka rukom hikai kaba thymmai, ka dei ban pynthikna ban pynbiang ia ki nonghikai, ioh ba kan pynkit shuh shuh ha ki nonghikai kiba la don lypa, kan long ka jingban khia bad kan buh jingeh pat ia ka pule pule.
U la ai jingmut ba kan bha ba kin leh haduh ka klas Fiv ym tang ha ka Klas IV. U la ong ba ka jingnang ia ka ktien ki Khasi da ki Garo, bad ki Garo ia ka Khasi kan wanrah ia ka jingiajan bad ka jingiatylli namar ba kan pynsuk ban iasam jingtip mar kylliang.
Ka la dei ban ai jingiaroh ia ka sorkar kaba la shim ia kane ka sienjam katkum ka National Education Policy (NEP) lyngba ka Three Language Formula, kaba ong ba nalor ka ktien Phareng, ka donkam sa ar tylli ki ktien lajong jong kata ka jylla. U bah Aristotle u la ong ruh ba ka donkam pat ban don ki nonghikai kiba la tbit, ym ban pynkit ha kijuh ki nonghikai kiba la don lypa bad ka syllabus ruh ka donkam ban shna lypa kaban iahap katkum kane ka juk mynta, nangta ka riti dustur jong ka jaitbynriew Khasi bad Garo.