PIB Shillong: Ka Myntri khynnah ba dei khmih ia ka Tnad Women and Child Development, Sorkar India, ka Savitri Thakur, ha ka sngi kaba ar jong ka jingwan jngoh jong ka ia ka jylla Meghalaya ka la pynlong ka jingleit jngoh ia East Khasi Hills District ha ka 16 tarik Iaiong 2025, ban peit bniah ka jingpyntreikam ïa ki skhim ba kongsan bad ban ïakren bad ki nongshim bynta ha ka kam.
Kum shi bynta ka jingleit jngoh, ka Myntri ka la leit ban jurip ïa ka One-Stop Centre, Shakti Sadan, kaba don ha Mawroh. Khatphra ngut ki briew, kiba don hapdeng ka rta 18 haduh 50 snem, ki sah mynta ha katei ka jaka bad ki iashim bynta ha ki prokram ai jinghikai ha ki kam bapher bapher. Ka Myntri ka la ïakren bad ki bad pynshlur ïa ki jingpyrshang jong ki na ka bynta ka jingpynkupbor bad ka jingpynbha.
Ka Myntri ka la leit jngoh ruh ia ka jaka sumar ia ki khynnah ha Mawkasiang, ha kaba ka la iakynduh bad ki nongtrei, ki khynnah, bad ki nongsumar. Ka la iaroh ia ka jingtrei jong kane ka jaka treikam ha kaba pynthikna ka jingiada bad jingsumar ia ki khynnah bad ka la ban jur ia ka jingdonkam ban bteng ia ka jingkyrshan ha ka liang ka bor pyrkhat bad ka jingpule kaba bha na ka bynta ki khynnah kiba donkam ia ka jingsumar bad jingiada.
Ha ka Anganwadi Centre ha Mawsmai, ka Myntri ka la peit bniah ïa ki jingshakri ba la ai hapoh ka skhim Integrated Child Development Services (ICDS), kynthup ïa ka jingbam ba tei met, ka jinghikai ia ki khynnah rit, bad ka jingpeit bniah ïa ka koit ka khiah. Ka la iaroh ia ka jingaiti jong ki Nongtrei Anganwadi bad ki Nongiarap bad ka la pynshlur ia ka jingiashim bynta jong ki nongshong shnong ha ki prokram ba iadei bad ka bha ka miat jong ki khynnah.
Ha ka jingleit jngoh jong ka ïa ka Community Health Centre (CHC) ha Sohra, ka Myntri ka la bishar bniah ïa ki jingshakri ha ka koit ka khiah jong ki longkmie bad ki khunlung, ka jingdon ki dawai ba kongsan, bad ka jingpynïasoh lang ïa ki skhim ka koit ka khiah bad ka jingbam ba tei met. Ka la pynskhem biang ïa ka jingkut jingmut jong ka Sorkar ban kyntiew ïa ka jingïoh jingsumar na ka bynta ki longkmie bad ki khynnah, khamtam ha ki jaka ba jngai bad ki jaka riewlum.
Ha kane ka jingleit jurip la kynthup ruh ia ka jingjurip ia ki projek pynroi ha ki jaka nongkyndong kiba hap hapoh ka MGNREGS bad PMAY-G. Ka Myntri ka la ïakren bad ki nongïoh jingmyntoi bad bishar bniah ïa ka jingïaid shaphrang bad ka jingktah jong kine ki sienjam. Ka la ai khublei ia ka jingiatreilang hapdeng ki tnad kaba iarap ban kyntiew ia ka kamai kajih ha ki jaka nongkyndong bad ki jingdon jingem.
Ka Myntri ka la pynkut ia ka jingleit jong ka da kaba ai khublei ia ki bor pyniaid District bad ki nongshim bynta ha ka thain namar ka jingtrei shitom jong ki ban pynkhlain ia ka jingai jingsumar ha ki jaka sumar, ka jingbam kaba tei, bad ka jingpynkupbor ia ki longkmie bad ki khynnah ha jylla Meghalaya.
Jurip ka Myntri Khynnah ka sorkar pdeng ia ki kam pynroi ha Mawkasiang, Mawsmai
