Shillong: Ha kaba iadei bad ka jingpynkhlain ka ingpyntreikam ïa ki skhim ba bei tyngka da ka sorkar pdeng bad ki prokram jong ka tnad Women and Child Development, Sorkar India, la pynlong ïa ki jingïalang mynta ka sngi ha nongbah Shillong. Ka Myntri khynnah jong ka sorkar jylla kaba dei khmih ia ka Tnad Women and Child Development, ka Savitri Thakur, ka la pynlong ïa ka jingialang peit bniah bad ki heh ophisar jong ka tnad Social Welfare jong ka Sorkar Meghalaya. Ki jingiakren ki long ban bishar bniah ia ka jingiaid shaphrang ki skhim ba kongsan kum ka Poshan Abhiyan, ka Mission Shakti, bad ka Mission Vatsalya. Ha kane ka jingialang, ka Myntri ka la ban jur ia ka jingdonkam ban pynkhlain ia ki rukom ai jingshakri ha ki jaka treikam, khamtam ha ka jingtreikam jong ki Anganwadi Centre.
Ha kane ka jingialang la ban jur ia ki bynta ba kongsan ba kynthup ka jingdonkam ia ka jingbam kaba tei met man ka por bad kaba bha hapoh ka Integrated Child Development Services (ICDS), ban kyntiew ia ki jingdon jingem ha ki Anganwadi Centre ban pynthikna ba ki long kiba iadei bad ki khynnah bad ki longkmie, ban pyndonkam ia ka teknoloji na ka bynta ban buddien ha ka por bad ban buddien ia ki nongioh jingmyntoi, ban pynshlur ia ka jingiashim bynta ka imlang sahlang, bad ka jingkyntiew ia ka bor treikam jong ki nongtrei Anganwadi ban ai ka jingshakri kaba kham bha.
Shuh shuh, la pynlong ïa ka jingpeit bniah bad ki bor pyniaid jong ka East Khasi Hills District kum shi bynta ka jingwan jngoh ka Myntri ïa ka thaiñ shatei lammihngi. Ha kane ka jingialang la don lang u MLA ka thain Bah Ollan Singh Suin bad ki nongmihkhmat na ki tnad treikam bapher bapher, ha kane ka jingialang la kynthup ia ki jingpynshai ba bniah halor ka jinglong jingman jong ki skhim pynroi bad ki projek ba iadei bad ki jingdon jingem ha ka district. Ki jingiakren ki la long halor ka jingpyntreikam ia ki skhim ba iadei bad ka jingkyntiew ia ki longkmie bad ki khynnah, ka koit ka khiah, ka pule puthi, ka roi ka par ha ki jaka nongkyndong, bad ka jingpynmih ia ki lad kamai kajih, ryngkat bad ka jingbishar bniah ia ka jingkiew shaphrang ha ki jaka ba jngai bad ki jaka nongkyndong bad ka jingithuh ia ki jingeh ba kongsan.
Ka Myntri Rangbah ka la ïaroh ïa ki sienjam jong ka sorkar jylla bad ong, “Watla ki don ki jingeh ha ka jingpynïasoh bad ka bording, ki ophisar ki trei da ka jingaiti lut ban pynthikna ka jingpyntreikam bha ia baroh ki skhim. Nga ai jingiaroh ia ki sienjam jong ki bad pynshlur ia ki ban iai pynthymmai ia ki jingtip halor ka Poshan Tracker, namar kine ki kaiphod ki iarap ia ka Tnad ban pynbiang kham kloi ia ki jingdonkam.”
Ka la bynrap shuh shuh, “Ngi kut jingmut ban pynurlong ïa ka thong jong u Myntri Rangbah duh Narendra Modi na ka bynta ka Viksit Bharat, bad man ka sienjam ba ngi shim ha ka jingpynkupbor ïa ki kynthei bad ki khynnah ka nang pynjan ïa ngi sha kata ka thong.
Hadien kane, ka Myntri khynnah jong ka sorkar pdeng ka la leit ïakynduh ïa u Lat ka Jylla Meghalaya. Ka jingialang ka kynthup ia ki jingiakren halor ki sienjam ba la ialam da ki jylla ban kyntiew ia ka bha ka miat jong ki kynthei bad ki khynnah bad ban kyntiew ia ki jingiarap ba la pynshong nongrim ha ka imlang sahlang na ka bynta ka roi ka par kaba kynthup ia baroh.
Ka jingwan jngoh ka pyni ia ka thong jong u Myntri Rangbah duh ban pynkhlain ia ka thain shatei lammihngi lyngba ka roi ka par ba la buh jingmut, ka jingkiew shaphrang kaba kynthup ia baroh, bad kyntiew ia ka jingpynpoi ia ki skhim ba iadei bad ka bha ka miat. Ki jingialang ki la ban jur ia ka jingkut jingmut jong ka Sorkar Pdeng bad ki Sorkar Jylla na ka bynta ka jingsynshar kaba iatreilang bad kyntiew ia ka jingim jong ki longkmie bad ki khynnah ha jylla Meghalaya. Ka jingleit jngoh ia ki Anganwadi Centre bad ki jaka ba pyntrei ia ki projek kan long ha ka sngi kaba bud ban peit bniah ia ka jingpyntreikam bad ka jingiatreilang bad ka imlang sahlang.