Shillong: Ka seng Voice of the People Party (VPP) ka la iaroh ia ka sienjam ba ka sorkar ka la thaw ia ka All-Party Committee (APC) ban iathir ia ki lad ki lynti halor ka jingdonkam ka lynti ha ka bynta ka Khasi-Jaintia ka jylla. Hynrei ka VPP ka sngew ba shwa ban iakren ia ka jingwanrah lynti rel ha Khasi-Jaintia Hills, ka long kaba donkam ban pynbeit shwa ia ki mat ba kongsan jong ki paidbah ban tehlakam ia ka jingwan rung ki briew nabar sha ka jylla.
Ha ka kyrwoh sha u Chief Secretary kaba la phah ha ka 12 tarik Iaiong, 2025, u General secretary ka VPP, u Dr. Ricky Andrew J Syngkon ula ong ba ka VPP ka sngew ba ka jingthaw ia ka Committee ban iakren bad pyntreikam ia ki ain ban tehlakam bad khang lad ia ka jingwan rung ki briew nabar sha ka jylla, kum ka Inner Line Permit (ILP), ka dei ban wan hakhmat shwa ban iakren ia ka lynti rel.
U la ong ba ka VPP ka ngeit ba tad ynda la don ki ain ban tehlakam ia ka jingwan rung ki briew nabar sha ka jylla, lah ban iakren ia ka jingwanrah ia ka lynti rel khlem iapein ia ka hok bad ka jinglong kyrpang jong ki trai shnong. Kano kano ka jingiakren ia ka lynti rel khlem pynbeit shwa ia ki jingeh jong ki paidbah, kan ialam pynban sha ka jingpynsyrwa kai ia ka por bad ka spah.
Halor kane ka daw, ka VPP ka pyntip ba kan ym treh ban iashim bynta ha ka Committee, la ong u nongaiktien ka VPP.
Syrwa kai ka por bad ka spah ban iakren lynti rel, thaw shwa ia ki ain, ai jingmut ka VPP ia ka sorkar
