Shillong: Ka Sengbah Ki Nongshat Nongkhein Hynniewtrep Hynniewskum (SKNNHH) ha Baniun, ka la shim ia ka sienjam kaba khraw ban hikai ban phrang ia kito kiba don ka sap ka phong ha ka shat ka khein.
Kane ka Sengbah kaba la seng ha u snem 1982, na ka bynta ban pynneh bad pynkiew ia ka niam ka rukom bad ka shat ka khein katkum ka riti dustur u Khasi. Ka Sengbah ym ba ka ai ka jingshakri ia ki briew lyngba ka duwai ka phirat, ka shat ka khein, ka knia ka khriam hynrei ka la shim ruh ia kawei ka bynta ban ai jinghikai ia kiba kwah bad thrang ha kane ka shat ka khein.
Ha ka jingiakren bad u President ka Sengbah, u Rangbah Pran Jala, u la iathuh ba haduh mynta ki don 6 ngut kiba la lah ban shim ia ka bynta ka shat ka khein, napdeng kiba bun kiba la shah hikai ha kane ka shlem, kaba don ha Baniun.
U Rangbah Pran u la ong ba ym tang ia ki shynrang hynrei la ai jinghikai ruh ia ki kynthei kiba wan shah hikai tangba ka jinghikai ka long ia ki kam ne ka bynta kiba kham jem bad kham suk kum ha ka sabuit sakai, ka pynlip ding bad kiwei.
Halor ka jingiapher hapdeng kiba nang ne ai sap hi ka mariang bad kiba shah hikai, u Rgh. Pran ula ong ba kiba shah hikai kin kham leh janai shuh lyngba ka jingshah hikai.
Mih ki Nongshat Nongkhein na ka shlem ka Sengbah Ki Nongshat ha Baniun
