Shillong: U MP ka Congress na Tura u Saleng A Sangma ula ong ba bun ki skhim sorkar pdeng ki sahkut ha ki ophis namar ba ki paidbah kim tip eiei ba ka sorkar ka la ai na ka bynta jongki.
Haba kren mynta ka sngi, u Saleng ula ong ba ka la donkam ban don ka jingpynshai paidbah ia ki skhim sorkar pdeng ha man ki Block khnang ba ki paidbah ne kito kiba dei ban ioh jingmtoi kin tip kumba ka dei ban long.
U MP ka Tura ula ong ba don kiba ioh skhim lyngba ki ksiang da kaba shim kabu ban khate ia kaba ki dei ban ioh bad wat ki ophisar ruh ki don kiba la shah sospen kumba la jia ha Mawryngkneng Block ha ki snem ba la leit, ha kaba u ophisar u donkti ban leh buit tuh.
U la ong ba ka dei ka kamram jong ki Deputy Commissioner ban leh ia kaba donkam bad lada ki DC ne ki BDO kim leh, ki paidbah ki dei ban ujor sha ka bor kaba dei peit. Haduh mynta kam pat don kano kano ka jingioh pdiang sha u ban ujor pyrshah ia ka jingbym shim khia ki DC ne ki BDO ne ki ophisar.
Ki skhim sorkar pdeng bun ki shu sahkut ha ophis, ki paidbah kim tip, ong u Saleng
