Shillong: Ka Ïewrynghep Secondary School, Mawnianglah ha ka sngi Thohdieng ka 11 tarik Ïaïong 2025 ka la pynkut noh ïa ka Annual Sports Meet 2025 kaba 11 ha madan ïalehkai jong ka Shnong Mawnianglah, ha kaba ka Blue House ka la ïoh rah ïa ka nam kum ka lahduh.
Ha kane ka sngi ba pynkut ïa ka Annual Sports Meet la donlang u Bah Raymond Kurkalang, Circle Inspector, Mawngap PS uba dei u Special Guest uba la shim ruh ïa ka salute jong ka March Pass namar ka jingbym poi u CEM ka KHADC Bah Shemborlang Rynjah uba la shah khot sngewbha kum u Kongsan.
La ïadonlang u Bah Stepherd Rynjah Principal jong ka skul, Bah Mighty Giri Kharmih Rangbah Shnong Mawnianglah uba dei ruh u President jong ka School Managing Committee, Kong Iba Kharkongor ba mihkhmat ïa ka BMC Education Department, Kong Diamond Shadap Coordinator jong ka Cluster Resoure Centre, ki nonghikai bad ki kmie ki kpa kiba haïing hasem jong ki khynnah skul.
Nalor ka March Pass, la pynlong ka jingpynïakob mareh 400m relay race. Ha ka liang ki kynthei la jop da ka Blue House katba ha ka liang ki shynrang la jop da ka Green House. Ha ka March Pass la jop da ka Green House bad ha ka football la jop da ka Blue House.
Hadien ka program la sam ïa ki khusnam sha baroh ki nongjop da ki Kongsan. La pynphuh pynphieng ha kane ka sngi da ka drill na ki khynnah skul.
Khur nam lahduh ka Blue House ha ka Annual Sports Meet 2025 ka Ïewrynghep Secondary school
